ការសិក្សាមួយបាននិយាយថា សក្តានុពលនៃការបំបៅដោះកូនអាចជួយម្តាយឱ្យគេចផុតពីគ្រោះថ្នាក់នៃជំងឺទឹកនោមផ្អែម។ ការស្រាវជ្រាវបានបង្ហាញថា ការបំបៅដោះកូនបានជួយសម្រួលដល់ការរំលាយអាហារ ការពារម្តាយពីជំងឺទឹកនោមផ្អែម។
ប្រព័ន្ធរំលាយអាហាររបស់ម្តាយបំបៅដោះកូនបានច្រើនជាង ៣ខែខុសពីម្តាយបំបៅដោះកូនក្នុងរយៈពេលខ្លី។
អ្នកស្រាវជ្រាវម្នាក់ជនជាតិអាលឺម៉ង់លោក Daniela Much បានលើកឡើងថា "ការបំបៅដោះកូនរយៈពេលយូរបានបង្កើនដល់ការផលិតសារធាតុផូស្វ័រលីពីត និងកាត់បន្ថយអាមីណូអាស៊ីតក្នុងប្លាស្មាឈាមរបស់ម្តាយ"។
តាមការស្រាវជ្រាវថ្មីៗនេះបានឱ្យដឹងថា សារធាតុមេតាប៉ូលីតក្នុងប្រព័ន្ធរំលាយអាហារបានជួយរារាំងដល់អាំងស៊ុយលីន និងជំងឺទឹកនោមផ្អែមប្រភេទ ២។
ការសិក្សាពីមុនបានបង្ហាញថា ការបំបៅដោះកូនច្រើនជាង ៣ខែក្រោយឆ្លងទន្លេរួច អាចជួយការពារអ្នកពីជំងឺទឹកនោមផ្អែមបានរយៈពេលច្រើនជាង ១៥ឆ្នាំ។
អ្នកវិទ្យាសាស្ត្រជាច្រើនបានវិភាគ និងពិនិត្យលើអ្នកកើតជំងឺទឹកនោមផ្អែមក្នុងពេលមានផ្ទៃពោះជិត ២០០នាក់។
អ្នកចូលរួមក្នុងការសិក្សាមួយនេះទទួលបានការព្យាបាលគ្លុយកូសក្នុងឈាមទុកជាមុន និងក្នុងកំឡុងពេលធ្វើតេស្ត។
លទ្ធផលបានបង្ហាញថា ជាមធ្យម ស្ត្រីដែលកើតជំងឺទឹកនោមផ្អែម ជាស្ត្រីបំបៅដោះកូនបានតិច និងក្នុងរយៈពេលខ្លីជាងស្ត្រីដែលបំបៅដោះកូនបានច្រើន និងគ្មានជំងឺទឹកនោមផ្អែម៕
Post a Comment