2016 - Kickac

Sunday, July 31, 2016

វិធីការពារទារកពីសត្វល្អិតទិច ឬខាំ

ពេលសត្វល្អិតខាំ អ្នកអាចវៃ បាញ់ ឬនៅឱ្យឆ្ងាយពីពួកវា។ ប៉ុន្តែទារករបស់អ្នកត្រូវការឱ្យអ្នកជួយការពារគេពីសត្វល្អិតទិច ឬខាំ។

ទារកអាយុក្រោម ២ខែ__អ្នកមិនអាចប្រើឡេ ឬបាញ់ថ្នាំបានឡើយ វិធីដ៏ប្រសើរបំផុតត្រូវឱ្យទារកអ្នកនៅឱ្យឆ្ងាយពីកន្លែងនោះ។

នៅក្នុងផ្ទះ__ប្រភេទសត្វល្អិត ជាពិសេសមូស សកម្មជាងគេបំផុត។ ត្រូវឱ្យកូនរបស់អ្នកនៅក្នុងផ្ទះ ដើម្បីការពារពីសត្វល្អិតខាំ។

សុវត្ថិភាពផ្ទះរបស់អ្នក__ត្រូវប្រាកដថា បង្អួច និងទ្វាររបស់អ្នកមានកញ្ចក់ ដើម្បីការពារពីការហើរ ឬវារចូលរបស់សត្វល្អិតមកខាងក្នុងផ្ទះ។

ស្លៀកខោអាវឱ្យកូន__ស្លៀកខោអាវឱ្យកូនអ្នក ដូច្នេះសត្វល្អិតមិនអាចខាំបាន។

- ស្លៀកខោ និងពាក់អាវដៃវែងរលុងៗ

- ស្រោមជើង

- មួក

កន្លែងងងឹត ដើមផ្កា ជាតំបន់ទាក់ទាញសត្វល្អិត។

ពាក់អាវសំណាញ់__ពាក់អាវសំណាញ់ឱ្យកូន ពេលនាំគេចេញទៅក្រៅ។

សម្ងួតទឹក__សម្លឹងមើលកន្លែងដែលទន់ ហើយសើមជុំវិញផ្ទះរបស់អ្នកដូចជា៖

- ផើងផ្កា

- អាងហែលទឹក

កម្ចាត់ទឹកដក់ក្នុងសំបកកង់។ ឧស្សាហ៍ផ្លាស់ប្តូរចានទឹករបស់សត្វចិញ្ចឹមឱ្យបានទៀងទាត់។

កម្ចាត់ក្លិនក្រអូប__សត្វល្អិតជាច្រើនចូលចិត្តក្លិនទឹកអប់ ស្ព្រាយបាញ់សក់ និងក្លិនក្រអូបរបស់សាប៊ូ។ ប្រើផលិតផលគ្មានក្លិនលើខ្លួនទារក(និងខ្លួនអ្នកផងដែរ ពេលនៅជាមួយកូន)។

ចៀសវាងកន្លែងសម្បូរសត្វល្អិត__សួនច្បារ ធុងសំរាម ស្លឹកឈើងាប់ៗ និងគុម្ពោតព្រៃ ជាកន្លែងសត្វល្អិតសម្ងំនៅ។

ទារកលើអាយុ ២ខែ__ពេលកូនអ្នកកាន់តែធំឡើងបន្តិច អ្នកអាចបាញ់ថ្នាំសម្លាប់សត្វល្អិត និងប្រើឡេលាបលើស្បែកគេ ដើម្បីការពារពីសត្វល្អិត។ បាញ់ថ្នាំសម្លាប់សត្វល្អិត ជាវិធីដ៏ប្រសើរបំផុត ការពារកូនអ្នកពីមូសខាំ បើប្រើវាឱ្យបានត្រឹមត្រូវ។

ការប្រើថ្នាំសម្លាប់សត្វល្អិត__មិនថាអ្នកប្រើថ្នាំបាញ់ ទឹក ក្រែម ប្រើចំពោះទារក អ្នកត្រូវ៖

- អានការណែនាំនៅលើកញ្ចប់

- សាកល្បងលើដៃអ្នកដំបូងសិន រួចលាបលើស្បែករបស់ទារក

- ប្រើវាក្នុងបរិមាណល្មម

- កុំលាបលើដៃក្មេង ឬក្បែរមាត់ និងភ្នែក

- ចៀសវាងប្រើលើស្បែកមុត រលាត់ ឬកន្ទួលរមាស់។

លាងសម្អាតដៃ ពេលអ្នកធ្វើរួច៕

វិធីសាស្ត្រមើលថែទាំក្មេងរពឹសឱ្យបានល្អ

នៅពេលកូនរបស់អ្នកចាប់ផ្តើមចេះវារ ក្រៅពីទាញកាមេរ៉ាថតវីដេអូ អ្នកក៏ត្រូវធ្វើរឿងសំខាន់ៗផ្សេងទៀតផងដែរ។ ក្នុងដំណាក់កាលនេះក្មេងកំពុងលូតលាស់ ធំធាត់ តែក៏អាចប្រឈមនឹងជំងឺ របួសផងដែរ។ អ្នកត្រូវដឹងពីវិធីអនាម័យ និងផ្តល់សុវត្ថិភាពដល់កូនតូចក្នុងផ្ទះ។ ប៉ុន្តែនៅពេលកូនអ្នកចេះវារ នោះរបៀបរៀបរយក្នុងផ្ទះ និងអនាម័យនឹងត្រូវផ្លាស់ប្តូរម្តងទៀត។

ខាងក្រោមនេះជាវិធីសាស្ត្រមួយចំនួនអាចជួយដល់អ្នកបាន ពេលកូនចេះវារ៖

១. អនាម័យក្នុងផ្ទះ

ឥលូវនេះ កូនរបស់អ្នកកំពុងឋិតក្នុងដំណាក់កាលលូតលាស់ដំបូង។ អ្នកត្រូវប្រុងប្រយ័ត្នឱ្យបានច្រើនចំពោះអនាម័យ។ ពីមុនគេនៅមួយកន្លែង តែពេលនេះគេធ្វើសកម្មភាពដោយសេរី។

- គេនឹងវារឡើងកាំជណ្តើរកាំទី ៤ ឡើងលើសាឡុង តុ ចូលផ្ទះបាយ

- គេនឹងញ៉ាំរបស់ផ្តេសផ្តាស បណ្តាលឱ្យឈឺ។

- អ្នកត្រូវជូតសម្អាតឥដ្ឋយ៉ាងតិចណាស់ ២ដងក្នុង ១ថ្ងៃ។

- ប្រសិនបើអ្នកមានកម្រាលព្រំ ត្រូវយកវាចេញ ព្រោះកម្រាលមិនអាចសម្អាតញឹកញាប់បានដូចឥដ្ឋឡើយ។

- ហើយក៏ត្រូវប្រាកដថា គ្មានអ្នកណាដើរចូលផ្ទះទាំងស្បែកជើង និងស្រោមជើងកខ្វក់ឡើយ។

ខាងក្រោមនេះជាវិធីសាស្ត្រមួយចំនួនអាចជួយដល់អ្នកបាន ពេលកូនចេះវារ៖

១. អនាម័យក្នុងផ្ទះ

- គេនឹងវារឡើងកាំជណ្តើរកាំទី ៤ ឡើងលើសាឡុង តុ ចូលផ្ទះបាយ

- គេនឹងញ៉ាំរបស់ផ្តេសផ្តាស បណ្តាលឱ្យឈឺ។

- អ្នកត្រូវជូតសម្អាតឥដ្ឋយ៉ាងតិចណាស់ ២ដងក្នុង ១ថ្ងៃ។

២. របួស

ក្មេងចេះវារអាចប្រឈមមុខនឹងគ្រោះថ្នាក់បំផុត។

- ដាក់ឧបករណ៍មុតស្រួចឱ្យនៅឆ្ងាយផុតពីដៃក្មេង។ សូម្បីតែរបស់តូចៗដូចជា កូនឃ្លី ក្មេងអាចដាក់ចូលមាត់។

- ប្រសិនបើផ្ទះរបស់អ្នកមានច្រើនជាន់ អ្នកត្រូវមានការប្រុងប្រយ័ត្នទ្វេដង។

- ពេលកូនអ្នកកំពុងគេងលើគ្រែ ឬក្នុងអង្រឹង អ្នកត្រូវដាក់ខ្នើយយ៉ាងតិច ៤នៅជុំវិញខ្លួនគេ ដើម្បីការពារការគេងរមៀលរបស់គេ។

៣. អនាម័យក្មេង

ក្រៅពីអនាម័យផ្ទះ អ្នកក៏ត្រូវអនាម័យកូនរបស់អ្នកផងដែរ។

- ជង្គង់ និងបាតដៃកូនអាចជាប់ធូលី។

- អ្នកត្រូវងូតទឹកកម្ចាត់មេរោគឱ្យគេយ៉ាងហោចណាស់ ២ដងក្នុង ១ថ្ងៃ។

- ពេលទារកឧស្សាហ៍វារញឹកញាប់ ស្បែកក្បាលជង្គង់របស់គេអាចខ្មៅ។ កុំបារម្ភច្រើនពេក ព្រោះវានឹងប្រសើរឡើងវិញ ពេលគេចេះដើរ៕

ហាមស្ត្រីមានផ្ទៃពោះទទួលទានផ្លែឈើទាំងនេះ

ពេលវេលាមានផ្ទៃពោះ ជាពេលវេលាដ៏សំខាន់បំផុតសម្រាប់ស្ត្រី និងទារក។ ដូច្នេះប្រសិនបើអ្នកមានផ្ទៃពោះ អ្វីដែលសំខាន់ អ្នកត្រូវយកចិត្តទុកដាក់ចំពោះអាហារគ្រប់យ៉ាងដែលអ្នកដាក់ចូលមាត់។

ការមានផ្ទៃពោះអាចប៉ះពាល់ដល់ប្រព័ន្ធភាពស៊ាំ ធ្វើឱ្យអ្នក និងកូនរបស់អ្នកងាយនឹងឆ្លងវីរុស បាក់តេរី ដែលបណ្តាលឱ្យកើតជំងឺផ្សេងៗ។ មានប្រភេទផ្លែឈើមួយចំនួន អ្នកគួរចៀសវាងក្នុងកំឡុងពេលមានផ្ទៃពោះ។ អ្នកចង់ឱ្យកូនមានសុខភាពល្អ ហេតុនេះអ្នកមិនត្រូវខកខានមើលការណែនាំខាងក្រោមឡើយ៖

ចៀសវាងផ្លែល្ហុង

ជាការពិតណាស់ ការបរិភោគល្ហុងអាចធ្វើឱ្យរលូតកូន ឬសម្រាលកូនបានលឿន។ ជាពិសេស ល្ហុងខ្ចី ឬស្រគៀលសម្បូរទៅដោយជាតិជ័រ ធ្វើឱ្យស្បូនកន្រ្តាក់។

តែទោះបីជាយ៉ាងណាក៏ដោយ ល្ហុងទុំមានប្រយោជន៍បំផុតចំពោះស្ត្រីមានផ្ទៃពោះ។ ល្ហុងខ្ចីសម្បូរទៅដោយវីតាមីន C និងសារធាតុចិញ្ចឹមល្អៗមួយចំនួនទៀត ដែលការពារអាការៈពេលមានផ្ទៃពោះដូចជា ឆ្អល់ក្តៅចុងដង្ហើម និងទល់លាមក។ ល្ហុងទុំលាយទឹកឃ្មុំ និងទឹកដោះគោក៏ជាឱសថដ៏ល្អបំផុតសម្រាប់ស្ត្រីមានផ្ទៃពោះដែរ ជាពិសេសក្នុងកំឡុងពេលបំបៅដោះកូន។

ចៀសវាងផ្លែម្នាស់

ការទទួលទានម្នាស់ក្នុងពេលមានផ្ទៃពោះពិតមិនល្អឡើយ ដូច្នេះអ្នកគួរចៀសវាងការបរិភោគផ្លែម្នាស់។

ម្នាស់សម្បូរទៅដោយសារធាតុប្រូមេឡេន (bromelain) បណ្តាលឱ្យកស្បូនទន់ ឆាប់សម្រាលកូន។

ស្ត្រីមានផ្ទៃពោះអាចទទួលទានម្នាស់ក្នុងបរិមាណល្មម វានឹងមិនប៉ះពាល់ដល់ការសម្រាលឡើយ លើកលែងតែស្ត្រីមានផ្ទៃពោះត្រីមាសដំបូង។

ចៀសវាងផ្លែទំពាំងបាយជូរ

អ្នកជំនាញវេជ្ជសាស្ត្រមួយចំនួនបានហាមស្ត្រីមានផ្ទៃពោះទទួលទានផ្លែទំពាំងបាយជូរ អ្នកជំនាញខ្លះទៀត ណែនាំឱ្យស្ត្រីមានផ្ទៃពោះទទួលទានវា។ អ្នកជំនាញភាគច្រើនហាមប្រាម ដោយសារថ្នាំសម្លាប់សត្វល្អិតបាញ់លើដើមទំពាំងបាយជូរ។

តែការទទួលទានផ្លែទំពាំងបាយជូរក្នុងកំឡុងពេលមានផ្ទៃពោះក៏អាចផ្តល់សារធាតុចិញ្ចឹមសំខាន់ៗដូចជា វីតាមីន A និង C។ ដូច្នេះអ្នកត្រូវទៅនិយាយជាមួយវេជ្ជបណ្ឌិតអ្នក មុនពេលអ្នកសម្រេចចិត្តញ៉ាំទំពាំងបាយជូរក្នុងពេលមានផ្ទៃពោះ។

ចៀសវាងផ្លែឈើមិនទាន់បានលាងសម្អាត

អាហារមានអនាម័យ ជារឿងមួយសំខាន់បំផុតចំពោះស្ត្រីមានផ្ទៃពោះ ដើម្បីចៀសវាងការឆ្លងមេរោគ។ ផ្លែឈើជាអាហារមួយដ៏ចាំបាច់សម្រាប់ស្ត្រីមានផ្ទៃពោះគ្រប់រូប៕

គុណសម្បត្តិ និងគុណវិបត្តិនៃការទទួលទានទំពាំងបាយជូរក្នុងកំឡុងពេលមានផ្ទៃពោះ

ការមានផ្ទៃពោះ ជាពេលវេលាអ្នកត្រូវទទួលខុសត្រូវលើអ្វីដែលអ្នកញ៉ាំ។ សរុបមក វានាំឱ្យខូចសុខភាពទាំងម្តាយ និងកូន។ មានអាហារជាច្រើនដែលអ្នកគួរញ៉ាំ ឬគួរចៀសវាងពេលមានផ្ទៃពោះ ជាពិសេសការទទួលទានទំពាំងបាយជូរ ជាប្រធានបទស្មុគស្មាញមួយដែលគួរតែពិភាក្សាឱ្យលម្អិត។

ការទទួលទានផ្លែទំពាំងបាយជូរក្នុងកំឡុងពេលមានផ្ទៃពោះនឹងទទួលបានទាំងគុណសម្បត្តិ និងគុណវិបត្តិ។ ផ្លែឈើនេះមានផ្ទុកនូវសារធាតុចិញ្ចឹមខ្ពស់ អាចជំនួយដល់សុខភាពទាំងម្តាយ និងកូន។ ទំពាំងបាយជូរផ្ទុកជាតិទឹក ៨៥% ជាតិស្ករពី ១០-៣៣%(គ្លុយកូស និងហ្វ្លាក់តូស) អាស៊ីតហ្គាលិក អាស៊ីតស៊ីលីសិក អាស៊ីតផូស្វ័ររិច សាលីសាឡិច អាស៊ីតជូរ អាស៊ីតអុកសាឡិច អំបិលកាលី សមាសធាតុតានីន ម៉ាញ៉េស្យូម កាល់ស្យូម និងវីតាមីន B1 B2 B6 B12 A C ព្រមទាំងអង់ស៊ីម។

ខាងក្រោមនេះនឹងរៀបរាប់បង្ហាញពីគុណសម្បត្តិ និងគុណវិបត្តិនៃការទទួលទានផ្លែទំពាំងបាយជូរក្នុងកំឡុងពេលមានផ្ទៃពោះ៖

គុណសម្បត្តិនៃការទទួលទានផ្លែទំពាំងបាយជូរក្នុងពេលមានផ្ទៃពោះ

ទំពាំងបាយជូរមិនត្រឹមតែផ្តល់អត្ថប្រយោជន៍ដល់ម្តាយប៉ុណ្ណោះទេ តែក៏ដល់កូនផងដែរ។ រៀនញ៉ាំទំពាំងបាយជូរក្នុងកំឡុងពេលមានផ្ទៃពោះ ដើម្បីជួយឱ្យគភ៌មានសុខភាពល្អ។

ទំពាំងបាយជូរល្អសម្រាប់ក្មេង

- ក្មេងទទួលទានទំពាំងបាយជូរច្រើន ជួយឱ្យភ្នែកភ្លឺ ព្រោះវាមានផ្ទុកវីតាមីន A និងសមាសធាតុ ហ្វ្លេវ៉ូណុលជំនួយភ្នែក។

- វត្តមានរបស់វីតាមីន B ក្នុងផ្លែឈើនេះ អាចជួយសម្រួលដល់ការរំលាយអាហាររបស់ស្ត្រីមានផ្ទៃពោះ ដូច្នេះគភ៌នឹងទទួលបានសារធាតុចិញ្ចឹមច្រើនពីម្តាយ។

- ទំពាំងបាយជូរក៏មានផ្ទុកធាតុហ្វូឡាត ជួយការពារពីបញ្ហាក្នុងសរសៃប្រសាទ ជួយឱ្យទារកគេចផុត ពីពិការភាព។

- អំបិលកាលី និងសូដ្យូមក្នុងទំពាំងបាយជូរ អាចជួយពង្រឹងប្រព័ន្ធសរសៃប្រសាទ និងអាស៊ីត ផូស្វ័ររិច ជួយឱ្យសែនរបស់ក្មេងកាន់តែប្រសើរឡើង។

ទំពាំងបាយជូរល្អចំពោះស្ត្រីមានផ្ទៃពោះ

ស្ត្រីមានផ្ទៃពោះងាយនឹងឈឺចាប់ក្នុងពោះ ដែលអាចព្យាបាលបានដោយការទទួលទានផ្លែទំពាំងបាយជូរ ព្រោះវាមានផ្ទុកធាតុម៉ាញ៉េស្យូម។

ជាតិសរសៃក្នុងទំពាំងបាយជូរជួយឱ្យម្តាយរំលាយអាហារបានយ៉ាងងាយស្រួល។

- ផឹកទឹកទំពាំងបាយជូរ ១កែវ ដើម្បីកាត់បន្ថយភាពតានតឹងរបស់ស្ត្រីមានផ្ទៃពោះ និងមុនពេល ចាប់ផ្តើមសម្រាលកូន

- សារធាតុប្រឆាំងអុកស៊ីតកម្មក្នុងផ្លែទំពាំងបាយជូរក៏ជួយការពារម្តាយពីការឆ្លងមេរោគ ធ្វើឱ្យភាព ស៊ាំរឹងមាំ

- ការផឹកទឹកទំពាំងបាយជូរជាប្រចាំ អាចជួយទប់ទល់នឹងការឡើងជាតិកូឡេស្តេរ៉ុលរបស់ស្ត្រីមាន ផ្ទៃពោះ

- វត្តមានរបស់សារធាតុប្រឆាំងការរលាកក្នុងទំពាំងបាយជូរ អាចជួយព្យាបាលបញ្ហាឈឺសន្លាក់ ដៃជើង និងជំងឺហឺត

គុណវិបត្តិនៃការទទួលទានផ្លែទំពាំងបាយជូរក្នុងកំឡុងពេលមានផ្ទៃពោះ

- ជាពិសេស ទំពាំងបាយជូរខ្មៅ បង្កបញ្ហាដល់ស្ត្រីមានផ្ទៃពោះ ព្រោះវាមានសំបកក្រាស់ ពិបាករំលាយ ធ្វើឱ្យប្រព័ន្ធរំលាយអាហារចុះខ្សោយ ពេលចម្រាញ់វាឱ្យទៅជាសារធាតុសម្រូប។

- ជាតិជូររបស់ទំពាំងបាយជូរធ្វើឱ្យស្ត្រីមានផ្ទៃពោះងាយនឹងឆ្អល់ក្តៅចុងដង្ហើម។ ការទទួលទាន ទំពាំងបាយជូរច្រើនពេក នាំឱ្យចង់ក្អួត និងក្អួតចង្អោរ។

- ប្រសិនបើស្ត្រីមានផ្ទៃពោះញ៉ាំវាច្រើនពេក កម្តៅក្នុងពោះនឹងកើនឡើង បណ្តាលឱ្យរាករូស។ ការរាក នេះធ្វើឱ្យរាងកាយបាត់បង់ជាតិទឹក៕

Saturday, July 30, 2016

AFC U-14៖ កម្ពុជា ស៊ីទីម័រខាងកើត ១១-០ តែចាញ់ឡាវ ១៣-០ មុនត្រឡប់មកផ្ទះវិញ

(ភ្នំពេញ)៖ បេសកកម្មចូលរួមប្រកួតពានរង្វាន់ AFC U-14 Regional Festival Of Football 2016 របស់ក្រុមយុវជន U-14កម្ពុជា បានបញ្ចប់ហើយ ប៉ុន្ដែមួយប្រកួតចុងក្រោយពីម្សិលមិញ បានបរាជ័យយ៉ាងចាស់ដៃក្រោមថ្វីជើងក្រុមយុវជន U-14ឡាវ ដោយលទ្ធផល ១៣-០ នៅប្រទេសប្រ៊ុយណេ កាលពីម្សិលមិញ ។

នេះជាការបរាជ័យធ្ងន់ធ្ងរជាងគេរបស់ក្រុម U-14កម្ពុជា ក្នុងចំណោម ៤ប្រកួតនៃពានរង្វាន់ប្រចាំទ្វីបខាងលើ បើទោះបីធ្លាប់យកឈ្នះក្រុមយុវជន U-14 ទីម័រខាងកើត ១១-០ ក៏ដោយ ។ ចំណែក ២ប្រកួតទៀត គឺឈ្នះយុវជន U-14 ហ្វីលីពីន ៣-១ បន្ទាប់មកប្រកួតចាញ់ក្រុមយុវជន U-14ម៉ាឡេស៊ី ដោយលទ្ធផល ៥-១ ។

ប៉ុន្ដែយ៉ាងណាពានរង្វាន់នេះ គ្រាន់តែជាការប្រកួតបង្គ្រប់កិច្ច ដើម្បីផ្លាស់ប្ដូរបទពិសោធន៍ និងទទួលបាននូវបច្ចេកទេសលេងថ្មីៗ ពីគ្នាទៅវិញទៅមក ដោយមិនគិតពីរឿងឈ្នះ ឬចាញ់ឡើយ ។ ដូច្នេះក្រុមចូលរួមសុទ្ធទទួលបានមេដាយ និងពានរង្វាន់អនុស្សាវរីយ៍ដូចគ្នា ៕

រដ្ឋាភិបាលកូរ៉េខាងជើង ស្នើឲ្យដកកងទ័ពសហរដ្ឋអាមេរិក ចេញពីកូរ៉េខាងត្បូង

(ព្យុងយ៉ាង)៖ រដ្ឋាភិបាលកូរ៉េខាងជើង នៅថ្ងៃព្រហស្បតិ៍ បានធ្វើការរិះគន់ចំពោះកំណើនវត្តមាន កងយោធាសហរដ្ឋអាមេរិក នៅប្រទេសកូរ៉េខាងត្បូង ហើយថា កងកម្លាំងសហរដ្ឋអាមេរិក នៅកូរ៉េខាងត្បូងគឺជា «ពេលវេលាគ្រាប់បែក»។ នេះបើយោងតាម សារព័ត៌មានស៊ិនហួ ចុះផ្សាយនៅយប់ថ្ងៃទី២៩ ខែកក្កដា ឆ្នាំ២០១៦នេះ។

អ្នកនាំពាក្យមួយរូប របស់គណៈកម្មាធិការសន្តិភាពជាតិ កូរ៉េខាងជើង បានចោទប្រកាន់សហរដ្ឋអាមេរិក ក្នុងការបញ្ជូនអាគុយប្រព័ន្ធការពារ គ្រាប់មីស៊ីល Patriot PAC-3 សម្រាប់ការធ្វើសមយុទ្ធយោធា ចេញពីកោះ Okinawa របស់ជប៉ុនទៅកាន់មូលដ្ឋានទ័ពអាកាសមួយ របស់សហរដ្ឋអាមេរិក នៅក្នុងទីក្រុង Kunsan ប្រទេសកូរ៉េខាងត្បូង នៅក្នុងការសម្រេចចិត្តរួមគ្នាមួយ ដោយរដ្ឋាភិបាលទីក្រុង Seoul និង Washington ក្នុងការដាក់ពង្រាយ ប្រព័ន្ធការពារគ្រាប់មីស៊ីល THAAD នៅលើទឹកដីឧបទ្វីបកូរ៉េ។

ការធ្វើសមយុទ្ធនេះធ្វើឡើង ក្នុងគោលបំណង ដើម្បីដឹកជញ្ជូនយ៉ាងឆាប់រហ័ស នូវប្រព័ន្ធការពារគ្រាប់មីស៊ីល ចេញពីប្រទេសជប៉ុនទៅកាន់កូរ៉េខាងត្បូង ដែលអាចនឹងមានជម្លោះមួយកើតឡើង នៅលើឧបទ្វីបកូរ៉េ។ នេះបើយោងតាមការចុះផ្សាយ របស់សារព័ត៌មាន Yonhap របស់កូរ៉េខាងត្បូង។

អ្នកនាំពាក្យបានបន្តថា កងកម្លាំងសហរដ្ឋអាមេរិក ដែលតាំងទីនៅកូរ៉េខាងត្បូង អាចជាគោលដៅចម្បងគេ នៃការវាយប្រហារណាមួយ ពីកូរ៉េខាងជើង ហើយបានជម្រុញឲ្យកូរ៉េខាងត្បូង ផ្លាស់ប្តូរគោលនយោបាយគាំទ្រ ដោយសហរដ្ឋអាមេរិករបស់ខ្លួនចេញ និងបានស្នើឲ្យដកកងកម្លាំង សហរដ្ឋអាមេរិក ចេញពីឧបទ្វីបផងដែរ។

កាលពីសប្តាហ៍មុន កូរ៉េខាងជើងបានបាញ់ គ្រាប់មីស៊ីលចំនួន៣គ្រាប់ ដែលគេជឿជាក់ថា ២គ្រាប់ជាមីស៊ីលរយៈចម្ងាយមធ្យម ឈ្មោះ Rodong និងមួយគ្រាប់ជាមីស៊ីលរយៈចម្ងាយខ្លីឈ្មោះ Scud នៅក្នុងការបង្ហាញសព្វាវុធ ប្រឆាំងនឹងការដាក់ពង្រាយប្រព័ន្ធការពារគ្រាប់មីស៊ីល THAAD នៅកូរ៉េខាងត្បូង។

ការបាញ់នេះត្រូវបានធ្វើឡើងក្រោយ៦ថ្ងៃ បន្ទាប់ពីទីក្រុង Seoul និង Washington បានព្រមព្រៀងដាក់ពង្រាយប្រព័ន្ធ ការពារគ្រាប់មីស៊ីល នៅតំបន់ Seongju ចម្ងាយប្រមាណ២៥០គីឡូម៉ែត្រ ពីទីក្រុង Seoul នៅចុងឆ្នាំនេះ៕

កាន់តែពិសេស.! ជាមួយនឹងការទទួលរង្វាន់ដ៏អស្ចារ្យ ក្នុងឱកាសសម្ពោធហាង «The Pizza Company» សាខាទី២១ ចោមចៅ

(ភ្នំពេញ)៖ ដើម្បីផ្ដល់ភាពងាយស្រួល ដល់អតិថិជនក្នុការជាវ ក៏ដូចជាទទួលទាន «The Pizza Company» បានធ្វើការបើកសម្ពោធ សាខាថ្មីមួយទៀត នៅថ្ងៃទី៣០ ខែកក្កដា ឆ្នាំ២០១៦នេះ ដែលមានទីតាំងស្ថិតនៅតាមបណ្ដោយ ផ្លូវសហពន្ធ័រុស្ស៊ី មុខអាកាសយាន្ដដ្ឋានអន្ដរជាតិភ្នំពេញ (ពោធិ៍ចិនតុង) ខាងកើតរង្វង់មូលចោមចៅ ចំងាយ៤០០ម៉ែត្រ។ ដឹភីហ្សាខមផេនីចោមចៅ ជាភោជនីយដ្ឋាន បែបភូមិគ្រឹះថ្មីសន្លាងដំបូងបង្អស់ ក្នុងចំណោមទាំង ២០សាខា។

«The Pizza Company» ជាប្រភេទហាង ដែលត្រូវបានរៀបចំឡើង តាមរចនាបទបែបអ៉ីតាលីទាំងផ្នែកខាងក្នុង និងក្រៅ។ អាចឲ្យអតិថិជន អាចទទួលទានបណ្ដើរគយគន់ទេសភាព ដ៏រស់រវើក និងសួនច្បារទឹកធ្លាក់យ៉ាងស្រស់ស្អាតទៀតផង។ អ្វីដែលកាន់តែពិសេសជាងនេះទៅទៀត គឺមានកន្លែងសម្រាប់កុមារលេងកំសាន្ដ និងចំណតយានយន្ដ ដ៏ធំទូលាយផងដែរ។

លោក ទេព វីរៈ អ្នកគ្រប់គ្រងទូទៅ នៃក្រុមហ៊ុន Express Food Group (EFG) បានឲ្យដឹងថា នេះជាហាងដ៏ប្រណិត ដែលស្ថិតក្នុងភូមិគ្រឹះទូលាយដំបូងបង្អស់ របស់ «ដឹភីហ្សាខមផេនី» ទាំងទីតាំងដែលជាច្រកចេញចូល ដ៏សំខាន់បំផុត នៃទីក្រុងភ្នំពេញ រចនាបទតុបតែង របស់ហាងនេះ ផ្តល់នូវសេចក្តីសោមនស្សរីករាយ របស់ក្រុមហ៊ុន(EFG) ក្នុងការផ្តល់ដល់អតិថិជន នូវរសជាតិ និងភាពដ៏ប្រពៃបំផុត ក្នុងការទទួលទានភីហ្សា ដែលប្រកបដោយរសជាតិ និងគុណភាពដាច់គេ។

អ្វីដែលកាន់តែពិសេស ពីហាង «The Pizza Company» សាខាថ្នីនោះ គឺមានកម្មវិធីពិសេសៗដូចជា ទទួលបានរង្វាន់ផ្តល់ជូនដ៏អស្ចារ្យ និងដ៏ជាទីពេញចិត្តរបស់អតិថិជន ដោយគ្រាន់តែថតរូបភាព របស់អ្នក រួមគ្រួសារឬមិត្តភក្ដិរបស់អ្នក ហើយប្រាប់ពីកន្លែង ដែលអ្នកកំពុងស្ថិតនៅ បង្ហោះនៅក្នុងបណ្ដាញសង្គមហ្វេសប៊ុក(Facebook) តែប៉ុណ្ណោះ។ ជាពិសេសជាងនេះទៅទៀត រាល់ការចំណាយចាប់ពី ១៥ដុល្លាឡើងទៅ លោកអ្នកនឹងមានឱកាសបង្វិលកង់ ផ្សងសំណាង ដើម្បីទទួលរង្វាន់ដ៏ច្រើនសន្ធាប់ជាច្រើនទៀត។

សូមជម្រាបដែរថា បច្ចុប្បន្ននេះភោជនីយដ្ឋាន «The Pizza Company» មានចំនួន២១ហាង រួមមានភីហ្សាសាខាបាត់ដំបង, សាខាក្រុងព្រះសីហនុ, សាខាក្រុងតាខ្មៅ, សាខាក្រុងសៀមរាប, សាខាផ្សារទំនើមសូរិយា, សាខាកាល់ម៉ែត, សាខាស្តាតចាស់, សាខាមុនីវង្ស,សាខាវិមានទិព្វ, សាខាមាត់ទន្លេ, សាខាកម្ពុជាក្រោម, សាខាអ៊ែតវ៉ូត, សាខាសកលវិទ្យាល័យPPIU, សាខាស្ទឹងមានជ័យ, សាខាធីខេអាវេនញូទួលគោក, សាខាផ្សារទំនើបអ៉ីអនម៉ល, សាខាម៉ៅសេទុង, សាខាវត្តសន្សំកុសល, សាខាសាមគ្គី, សាខាបឹងកេងកង រួមនឹង ដឹផីហ្សាសាខាចោមចៅ៕

វិធីសាស្រ្តហ្វឹកហាត់បាល់ទាត់បែបថ្មីរបស់ Barcelona មើលទៅចម្លែកណាស់!

(ក្រុងឡុងដ៍)៖ ការប៉េងប៉ោង រាងដូចពពុះ (Bubble) ត្រូវបានគ្រូបង្វឹក Luis Enrique ប្រើដើម្បីបង្វឹកកូនក្រុម ត្រៀមជួប ក្រុម Celtic របស់ស្កុតឡេនរាត្រីនេះ ក្នុងចក្រភពអង់គ្លេសនៃមិត្តភាពអន្តរជាតិ មុនរដូវកាលថ្មីចាប់ផ្តើម។

សារព័ត៌មាន Dailymail បានឲ្យដឹងថា ក្រុមជើងឯកអេស្ប៉ាញ FC Barcelona កំពុងធ្វើការហ្វឹកហាត់យ៉ាងខ្លាំងក្នុងសប្តាហ៍នេះ មុនពេលប្រមូលផ្តុំកីឡាករឡើងវិញ ហើយជាក៏ជា១ប្រកួតដំបូងរបស់គេផងដែរ ពេលជួបក្រុម Celtic មុន ចាប់ផ្តើមរដូវកាលថ្មីឆ្នាំ២០១៦-២០១៧ ក៏មានកីឡាករឆ្នើមប្រចាំក្លឹប Lionel Messi និង Luis Suarez ចូលរួមទៀតផង។

សូមបញ្ជាក់ថា Barcelona ត្រូវជួបក្រុម Celtic នៅម៉ោង ១២៖០០នាទីរាត្រីនេះ ក្នុងប្រទេសអង់គ្លេស ក្នុងយុទ្ធនាការ ដណ្តើមពានរង្វាន់មិត្តភាពអន្តរជាតិ International Champions Cup ឆ្នាំ២០១៦ នេះ៕

ភាពយន្តបែបកំប្លែង ព្រឺព្រួច រន្ធត់ រឿង «៣០ថ្ងៃ» ចាក់បញ្ចាំងថ្ងៃទី៣១ ខែសីហានេះហើយ! មានវិឌីអូ

(ភ្នំពេញ)៖ ភាពយន្តបែបកំប្លុកកំប្លែង ភ័យរន្ធត់ ព្រឺព្រួច មានចំណងជើងថា«៣០ថ្ងៃ» ដែលជាវណ្ណកម្មថ្មីមួយទៀត របស់ផលិតកម្ម មហាហង្ស នឹងត្រៀមចាក់បញ្ចាំងជូនទស្សនិកជន ទស្សនានៅថ្ងៃទី៣១ ខែសីហា ឆ្នាំ២០១៦នេះ នៅតាមបណ្ដារោងភាពយន្តទំនើបនានា ក្នុងក្រុងភ្នំពេញ និងខេត្តសៀមរាប។

ភាពយន្តរឿង «៣០ថ្ងៃ» បាននិយាយ អំពីដំណើរដើមទងរបស់ក្រុមហ៊ុនមួយ ដែលបានមកជួលផ្ទះក្នុងតម្លៃថោក ប៉ុន្តែម្ចាស់ផ្ទះបាន ប្រាប់ថា បើក្រុមហ៊ុននេះ អាចដំណើរការអាជីវកម្មរបស់ខ្លួន បានលើសពី៣០ថ្ងៃ ពោលឲ្យតែឈានចូលដល់៣១ថ្ងៃម្ចាស់ផ្ទះ នឹងប្រគល់ ឲ្យក្រុមហ៊ុននេះ បន្តអាជីវកម្មរហូតដល់ទៅ ៥ឆ្នាំ ។ លើសពីនេះ អ្វីដែលពិសេសទៅទៀតនោះ គឺម្ចាស់ផ្ទះបានបើកដៃ ឲ្យម្ចាស់ក្រុមហ៊ុន ដែលជាកំឡោះសង្ហា តាមញ៉ែកូនក្រមុំរបស់ខ្លួនឲ្យបានទៀតផង ហើយបើញ៉ែបាន និងត្រូវរ៉ូវគ្នា ម្ចាស់ផ្ទះនឹងលើកឲ្យម្ចាស់ក្រុមហ៊ុន នោះទៀតផង ។

យ៉ាងណាមិញ អ្វីដែលនៅពីក្រោយខ្នង នៃភាពងាយស្រួលនេះ គឺដោយសារតែផ្ទះនេះ មានខ្មោចរស់នៅមួយគ្រួសារមិនព្រមទៅ ចាប់ជាតិអ្វីទាំងអស់ ហើយម្ចាស់ផ្ទះចង់លក់ ឲ្យទៅនរណាផ្សេងក៏មិនបាន ។ ហេតុដូចនេះម្ចាស់ផ្ទះ ចង់សាកទៅលើម្ចាស់ក្រុមហ៊ុន ដែលទើបមកពីបរទេសមួយនេះ ដើម្បីចង់ដឹងថា តើពួកគេមានវិធីសាស្រ្តអ្វី ក្នុងការកំចាត់ខ្មោច ចេញពីផ្ទះនេះហើយក៏ក្នុងបំណងផ្សាសាច់ផ្សាឈាម ជាមួយគ្នាទៀតផង ។

ទោះជាយ៉ាងណា ក្នុងដំណាក់កាលនៃការ បើកអាជីវកម្មលក់ស្រោមអនាម័យ របស់ក្រុមហ៊ុនមកពីបរទេសខាងលើបានជួបប្រទះ នូវអហ្ភូតហេតុជាច្រើន មានទាំងភាពភ័យរន្ធត់ ព្រលឹងចុងសក់ និងកំប្លែងលាយឡំគ្នា ។ ប៉ុន្តែចុងក្រោយ ដោយសារតែមានគ្រូ បង្ក្រាបខ្មោច ដ៏ចម្លែកម្នាក់ប្រាប់ថា ខ្មោចទាំងនោះខ្វះមនោសញ្ចេតនា ទើបពួកគេប្រើយ័ន្តប្លែក និងវិធីកម្ចាត់ពិសេសមួយ ទើបខ្មោចទាំងនោះ ព្រមទៅចាប់ជាតិបានសម្រេច ហើយពួកគេក៏បានស្នាក់នៅគម្រប់៣០ថ្ងៃ ឆ្លងចូល៣១ថ្ងៃ សម្រេចតាមលក្ខខណ្ឌ របស់ម្ចាស់ផ្ទះ យ៉ាងសុខសាន្ត៕

តារាសម្ដែង នាង សូរ្យ អេណា រងការជេរបញ្ចោកប់ៗមាត់ ពីអ្នកលេង Facebook ម្នាក់ថា «មីសំផឹងគ្រប់ជាតិ យកប្តីគេ»

(ភ្នំពេញ)៖ ពិតជារឿងដ៏គួរឲ្យភ្ញាក់ផ្អើលខ្លាំងបំផុត ខណៈនៅសុខៗស្រាប់តែមាន Acount Facebook មួយបានចេញមុខហែកហួ ដោយចោទប្រកាន់ថា តារាសម្តែង និងជាតារាម៉ូឌែល កញ្ញា សូរ្យ អេណា បានលួចទាក់ទងស្នេហ៍ជាមួយប្តីគេ ដោយប្រើពាក្យអសុរោះជេរបញ្ចោ កប់ៗមាត់គួរឲ្យព្រឺក្បាល។ មិនតែប៉ុណ្ណោះ ស្រីម្នាក់នោះ ក៏បានបញ្ជាក់ទៀតថា តារាស្រីនាង សូរ្យ អេណា មិនត្រឹមតែយកប្តីគេនោះទេ នាងថែមទាំងហ៊ានផ្គើន ចង់ណាត់ជួបមុខប្រពន្ធគេទៀតផង។

នៅលើ Acount Facebook ដែលមានឈ្មោះថា «Marie Yong» បានបង្ហោះភ្ជាប់ជាមួយរូបភាព និងសរសេរជេរបញ្ចោ យ៉ាងកប់ៗមាត់ លើតារាស្រីកញ្ញា សូរ្យ អេណា ថា «ជួយមើលមីសំផឹងគ្រប់ជាតិនិង(ហ្នឹង)វាផ្ញើសារមកជេរប្រពន្ធដើមគេចុះលោកអើយ លោកអត់ដែលឃើញទេ។ ពិតជាធ្វើស្រីសំផឹងដ៏ក្លាហានមែន ចឹងតើបានជាចេះតែមានគេជះទឹកអាស៊ីត មកពីយកប្តីគេហើយផ្គើនដាក់ប្រពន្ធគេចឹង។ សមគ្នាហើយយកទៅអាក្តម៉ាយួ១០០ និងមីក្តិតម៉ា១០០ដូចគ្នា អូរមួយវិញទៀត កុំឲ្យថាអាញ់មិនបានប្រាប់អាសារទៅពិនិត្យឈាមផង ណាមីអស់សាច់!»។

ប្រភពពីម្ចាស់ Acount Facebook ដដែលនេះបានបន្តថា «ជួយ Shres ឲ្យមីរលាយនឹងបានមើលផង គ្មានម៉ែឪណាប្រដៅកូនឲ្យយកប្តីគេដូចឪងែងទេ ឲ្យតែក្តរបស់គេ ដឹងតែមានជាតិណាស់មីខ្មៅ ខ្មៅទាំងក្តិតហើយ នៅខ្មៅចិត្តទៀត។ ហ៊ានផ្គើនផ្ញើសារឆ្លើយឆ្លង ជាមួយប្រពន្ធគេសុទ្ធតែបើខ្លាំង ឲ្យប្រពន្ធដើមចេញមុខមកជួបងែងទៀត។ ប្រពន្ធដើមគេមិនខ្លាំងដូចមីរន្ទះផ្ទប់ឯងចឹងទេ!»។

ម្ចាស់ Acount Facebook ឈ្មោះថា «Marie Yong» នេះបានបន្ថែមថា «សំណាងណាស់ ប៉ះប្រពន្ធគេស្លូត បើប៉ះប្រពន្ធគេកាចវិញ ច្រាស់ទឹកអាស៊ីតហើយមីសំផឹង។ ដូរឡានថ្មី ទិញផ្ទះថ្មី ដើរលេងហ៊ឺហារណាស់ ជាចុងក្រោយនេះជូនពរឲ្យហងងាប់ដោយសារក្តប្តីគេ មីនេះវាធ្វើតារាដើម្បីតែទាក់យកប្តីគេ មីស្រែកឃ្លានប្តីគេ វាមិនខ្មាស់គេទេ ដែលវាធ្វើចឹង!»។

នៅព្រឹកថ្ងៃទី៣០ ខែកក្កដា ឆ្នាំ២០១៦ នេះគេហទំព័រ Khmertalking មិនទានអាចស្វែងរកការបំភ្លឺ ចំពោះការចោទប្រកាន់ខាងលើ ពីសំណាក់សាមីខ្លួន កញ្ញា សូរ្យ អេណា បាននៅឡើយទេ។ ដូច្នេះKhmertalkin រង់ចាំស្វាគមន៍ជានិច្ចនូវរាល់ការចេញមុខ បកស្រាយពីកញ្ញា សូរ្យ អេណា ដើម្បីបញ្ជាក់ការពិត និងជម្រះមន្ទិលសង្ស័យ។

សូមបញ្ជាក់ដែរថា មិនត្រឹមតែជេបញ្ចោរប៉ុណ្ណឹងនោះទេ គឺម្ចាស់ Acount Facebook ដែលមានឈ្មោះថា «Marie Yong» បានជេរប្រមាថដោយប្រើប្រាស់ពាក្យអសុរោះ ពិបាកនឹងស្តាប់ជាច្រើនទៀត ទៅលើតារាស្រីកញ្ញា សូរ្យ អេណា ប៉ុន្តែយ៉ាងមិញ Khmertalking សូមមិនធ្វើការបរិយាយទាំងអស់នោះទេ គឺទុកភារកិច្ចនេះ ដើម្បីឲ្យប្រិយមិត្តចូលអានខ្លឹមសារលម្អិត និងពិចារណា នៅខាងក្រោមនេះទាំងអស់គ្នាចុះ៕

ហួសចិត្ត! ស្រវឹងស្រា ខំបើកបរមកឲ្យប៉ូលិសជួយជូនទៅកន្លែងផ្សេង ដូចមកប្រាប់ឲ្យចាប់ខ្លួន

(ញូវហ្សឺលែន)៖ ស្ត្រីម្នាក់រស់នៅប្រទេសញូវហ្សឺលែនត្រូវបានចាប់ខ្លួន បន្ទាប់ពីនាងបើករថយន្តចូលមកកាន់ប៉ុស្តិ៍ប៉ូលិសដោយខ្លួនឯង ដើម្បីប្រាប់ពួកគេថា នាងស្រវឹងខ្លាំងណាស់ ដែលបើកបរមកទីនេះ។

Amanda Jane Boyd អាយុ៥០ឆ្នាំនិយាយថា នាងកំពុងធ្វើរឿងត្រឹមត្រូវដែលមករកប៉ូលិស ដើម្បីស្នើពួកគេជួយនាំនាងទៅកន្លែងដែលចង់ទៅដែលនាងមិនគិតថា ត្រូវគេចាប់ខ្លួនបែបនេះទេ។ ស្ត្រីចំណាស់រូបនេះមានអាការៈស្រវឹងស្រាខ្លាំង ពេលដែលនាងមកដល់ស្ថានីយប៉ូលិស Blenheim ហើយពេលមកដល់នាងប្រាប់មន្ត្រីប៉ូលិសថា ខ្លួនចង់ទៅវិហារគ្រីស្តតែ ដោយនាងស្រវឹងខ្លាំងចង់ឲ្យពួកគេជូននាងទៅទីនោះ ប៉ុន្តែមិនសំណាងនាង បែរជាត្រូវចាប់ខ្លួនទៅវិញព្រោះប៉ូលិសដឹងថា នាងបើករថយន្តទាំងស្រវឹងមកទីនេះ ដែលការធ្វើតេស្តជាតិអាល់កុល លើសកម្រិតខ្លាំង។

នេះជាលើកទីបីដែល Amanda Jane Boyd ត្រូវចាប់ខ្លួន ព្រោះបើកបរក្នុងស្ថានភាពស្រវឹងជោគជាំបែបនេះ ហើយលើកនេះដែលនាងគិតថា កំពុងធ្វើរឿង ត្រឹមត្រូវបើករថយន្តមកប៉ុស្តិ៍ ប៉ូលិសឲ្យពួកគេជួយ ជូនទៅវិហារគ្រីស្ត បែរជាមិនដូចការគិតព្រោះ នាងត្រូវចាប់ខ្លួនពីបទបើកបរទាំងស្រវឹង៕

អាយុ ១៤ឆ្នាំសោះ លួចរថយន្តបើកដឹកគូស្នេហ៍ អាយុ ១២ឆ្នាំ ដើរលេង អកុសលជួបគ្រោះថ្នាក់ ស្លាប់ខាងស្រី

(កាណាដា)៖ គួរឲ្យភ្ញាក់ផ្អើលមែន ដែលក្មេងប្រុសអាយុ១៤ឆ្នាំម្នាក់ ក្លាយជាចោរលួចរថយន្តមួយគ្រឿង បើកទៅដឹកមិត្តស្រីអាយុ១២ឆ្នាំដើរលេង រួចរហូតជួបគ្រោះថ្នាក់ចរាចរណ៍ បណ្តាលឲ្យគូស្នេហ៍ក្មេងខ្ចីត្រូវ ស្លាប់យ៉ាងអណោចអធ័ម។

ហេតុការណ៍នេះ កើតឡើងនៅផ្លូវ Hurontario រដ្ឋ Ontario ប្រទេសកាណាដា ក្មេងប្រុសបង្កហេតុមិនត្រូវបានស្គាល់ អត្តសញ្ញាណទេ ដោយនៅថ្ងៃកើតហេតុ គេបានលួចរថយន្តមួយគ្រឿង ម៉ាក Toyota SUV ដែលមានតម្លៃជាង ៥ពាន់ដុល្លារ ពីតំបន់មួយទៅដឹកក្មេងស្រី ជាដៃគូដើរកំសាន្ត តែអកុសល ក៏បើកមិនប្រយ័ត្ន ក៏ទៅបុករនាំងផ្លូវ ចូលកន្លែងបោះជំរំមួយ បណ្តាលឲ្យរថយន្តខូចខាតទាំងស្រុង។

ចំណែកក្មេងស្រីក៏ស្លាប់ នៅកន្លែងកើតហេតុ ប៉ុន្តែក្មេងប្រុសមិនគ្រោះថ្នាក់ ដល់ជីវិតទេហើយកំពុងសម្រាកព្យាបាលខ្លួន នៅមន្ទីរពេទ្យមុននឹងត្រូវប៉ូលិសសួរចម្លើយ ព្រោះគេជាប់ពាក់ព័ន្ធ នឹងករណីជាច្រើន ដូចជាបើកបរដោយការធ្វេសប្រហែស បណ្តាលឲ្យមនុស្សស្លាប់ គ្មានប័ណ្ណបើកបរ និងចោរកម្មផងដែរ៕

គួរឲ្យព្រួយបារម្ភ! វីរុស Zika ៤ករណី ទំនងជាអាចចម្លងពីសត្វមូស នៅក្នុងទឹកដីអាមេរិកផ្ទាល់

(ផ្លូរីដា)៖ រដ្ឋផ្លូរីដាទំនងជាមានករណីដំបូង នៃវីរុស Zika ដែលចម្លងដោយសត្វមូស នៅលើទឹកដីសហរដ្ឋអាមេរិក។ នេះបើតាមសម្តីអភិបាលរដ្ឋលោក Rick Scott ដែលត្រូវបាន ដកស្រង់ដោយសារព័ត៌មានស៊ិនហួ នៅព្រឹកថ្ងៃសៅរ៍ ទី៣០ ខែកក្កដា ឆ្នាំ២០១៦នេះ។

មិនទាន់មានសត្វមូសនៅក្នុងរដ្ឋ ត្រូវបានធ្វើតេស្តដឹងថា មានផ្ទុកវីរុស Zika នោះទេ ប៉ុន្តែមានស្រ្តីម្នាក់ និងបុរស៣នាក់នៅតំបន់ Miami-Dade និងតំបន់ Broward ទំនងជាផ្ទុកវីរ៉ុសនេះដោយសារសត្វមូលខាំ។ នេះបើតាមសម្តីលោក Rick Scott លើកឡើងក្នុងសន្និសីទសារព័ត៌មានមួយនៅទីក្រុង Orlando។

កន្លងមកនេះ មនុស្ស១,៦៥០នាក់ទៅហើយ ដែលបានឆ្លងវីរ៉ុស Zika នៅក្នុងសហរដ្ឋអាមេរិក ប៉ុន្តែអ្នកជំងឺ៤នាក់នៅក្នុងរដ្ឋ Florida នេះអាចជាអ្នកជំងឺដំបូង ដែលមិនជាប់ពាក់ព័ន្ធនឹង ក្រុមអ្នកធ្វើដំណើរនៅខាងក្រៅសហរដ្ឋអាមេរិក។

ក្រុមមន្ត្រីសុខាភិបាលជឿជាក់ថា ការចម្លងវីរុសនេះ បានកើតឡើងនៅតំបន់តូចមួយ ភាគខាងជើងនៃ ទីក្រុង Miami នៃស្រុក Wynwood expressions ជាស្រុកល្បីល្បាញមួយ នៅសហរដ្ឋអាមេរិក។ បច្ចុប្បន្នផ្នែក វេជ្ជសាស្ត្ររបស់អាមេរិកកំពុងតែសស្រាក់សស្រាំយ៉ាងខ្លាំង ក្នុងការស្វែងរកប្រភពដើមនៃវីរុស ដែលដំបូងឡើងបានរីករាលដាលតែនៅតំបន់អាមេរិកខាងត្បូងនោះ៕

ប្រតិភូ និងអត្តពលិកកម្ពុជា ទៅដល់ប្រេស៊ីលហើយ ក្រោយធ្វើដំណើរអស់ជាង ៣០ម៉ោង

(ភ្នំពេញ)៖ ប្រតិភូ គ្រូបង្វឹក និងកីឡាករ-កីឡាការិនីជម្រើសជាតិកម្ពុជា ដែលចេញទៅដំណើរចូលរួមប្រកួតកីឡាអូឡាំពិក Olympic Games នៅទីក្រុង Rio ប្រទេសប្រេស៊ីល បានទៅដល់គោលដៅដោយសុវត្ថិភាពហើយ បន្ទាប់ពីធ្វើដំណើរអស់រយៈពេល ៣០ម៉ោង។ នេះបើយោងតាមប្រភពព័ត៌មានលើទំព័រ Facebook ផ្លូវការរបស់គណៈកម្មាធិការជាតិអូឡាំពិកកម្ពុជា NOCC។

នៅព្រឹកថ្ងៃទី៣០ ខែកក្កដានេះ មន្ដ្រី NOCC បានបង្ហោះលើប្រព័ន្ធទំនាក់ទំនងយក្សនេះថា «បន្ទាប់ពីចំណាយពេលហោះហើរនិងប្តូរជើងយន្តហោះសរុប៣០ម៉ោងរួចមកប្រតិភូ គ្រូបង្វឹក កីឡាករ-ឡាការិនីកម្ពុជា បានមកដល់ព្រលានយន្តហោះទីក្រុងរីយ៉ូ ប្រទេសប្រស៊ីល ដោយសុវត្ថិភាព ហើយនឹងត្រូវធ្វើដំណើរបន្តតាមរថយន្តចំនួន ២ម៉ោងទៀតទៅកាន់បុរីអូឡាំពិក»។

គួរបញ្ជាក់ផងដែរថា បេសកកម្មនេះ គឺដឹកនាំដោយលោក វ៉ាត់ ចំរើន អគ្គលេខាធិការ NOCC ខណៈអត្តពលិកកម្ពុជា ៦រូប រួមមានកីឡាការិនីតេក្វាន់ដូ ស៊ន សៀវម៉ី, កីឡាហែលទឹក ពូ សុវិជ្ជា និងកីឡាការិនី ហែមថុន វិទីនី, កីឡាអត្តពលកម្ម (រត់ប្រណាំង) នីកូ និងកីឡាការិនី លី ណារី និងកីឡាការិនីចំបាប់ ចូវ សុធារ៉ា។ ចំណែកពិធីបើកការប្រកួតកីឡា Olympic Games លើកទី៣១នេះ នឹងធ្វើឡើងនៅថ្ងៃទី០៥ ខែសីហាខាងមុខនេះ៕

Friday, July 29, 2016

សួស វីហ្សា ដល់ថ្ងៃឡើងជ្រុញ ស្នើដល់មហាជន បោះឆ្នោតជួយគាំទ្រ

(ភ្នំពេញ)៖ ខណៈដែលការប្រឡងក្នុងកម្មវិធី កំពូលតារាអាជីពដ៏ល្បី «I am a vocalist Cambodia» ដែលរៀបចំឡើង ដោយស្ថានីយទូរទស្សន៍ហង្សមាស សប្តាហ៍ទី២ កាន់តែកៀកចូលមកដល់ តារាចម្រៀងរូបស្រស់សម្តីផ្អែម កញ្ញា សួស វីហ្សា កាលពីប៉ុន្មានម៉ោងមុននេះ បានបង្ហោះសារនៅលើបណ្តាញសង្គមហ្វេសប៊ុកដោយបង្ហាញពីអារម្មណ៍ភ័យផង និងអរផង ហើយក៏បានស្នើឲ្យមហាជន បោះឆ្នោតគាំទ្រនាងផងដែរ។

តារាចម្រៀងស្រី កញ្ញា សួស វីហ្សា បានសរសេរបង្ហោះភ្ជាប់ ជាមួយរូបបែបនេះថា «ថ្ងៃស្អែកដល់ពេលឡើងជ្រុញហើយ បងប្អូនទាំងអស់គ្នាតើបងប្អូន មានជួយបោះឆ្នោតឲ្យខ្ញុំខ្លះអត់? លេខរៀងខ្ញុំ លេខ៥ ផ្ញើទៅ២០១៦ ជាកាស្រេច ។ មិនដឹងថាយប់ស្អែកនេះ អ្នកណាត្រូវចាកចេញមុនគេទេ (I am a vocalist Cambodia)»។

កញ្ញា សួស វីហ្សា ក៏បានបន្ថែមថា «ពុកម៉ែបងប្អូនអាចចូលរួមទស្សនា ដោយសេរីនៅស្ទូឌីយ៉ូហង្សមាស HDTV ក្នុងផ្សារទំនើប Eon Mall ជាន់ទី៤ ដោយមានការផ្សាយផ្ទាល់ នៅលើកញ្ចក់ទូរទស្សន៍ហង្សមាស HDTV ផងដែរ។ មានតែពុកម៉ែបងប្អូនទេ ដែលជាអ្នកដាក់ពិន្ទុលើសម្លេង នឹងជាអ្នកសម្រេចជោគវាសនា របស់ពួកខ្ញុំ។ បើស្រឡាញ់ចូលចិត្តសម្លេងរបស់ខ្ញុំ សូមចូលរួមបោះឆ្នោតគាំទ្រដល់នាងខ្ញុំផង ព្រោះវាសនារបស់ខ្ញុំ ស្ថិតក្នុងការបោះឆ្នោតរបស់បងប្អូនហើយ!»។

បន្ទាប់ពីឃើញការបង្ហោះ របស់តារាចម្រៀងស្រី កញ្ញា សួស វីហ្សា ដោយទទូចស្នើឲ្យមានការផ្ញើសារចូលរួមបោះឆ្នោតឲ្យនាង យ៉ាងដូច្នេះ គេសង្កេតឃើញមានអ្នកគាំទ្រនាងជាច្រើន បានផ្ញើសារឆ្លើយតបវិញថា ពួកគេនឹងចូលរួមបោះឆ្នោតគាំទ្រ វីហ្សា ដើម្បីបានបន្តនៅក្នុងកម្មវិធីនេះ។

សូមបញ្ជាក់ថា កម្មវិធីប្រឡងកំពូលតារាអាជីពដ៏ល្បី «I am a vocalist Cambodia» ដែលទិញសិទ្ធិផ្តាច់មុខ ដោយក្រុមហ៊ុនហង្សមាស HDTV គឺជាកម្មវិធីប្រឡងចម្រៀងល្បីលេខ១ នៅប្រទេសកូរ៉េ និងចិន ដែលបច្ចុប្បន្នបានបង្ហាញវត្តមាន នៅលើទឹកដីប្រទេសកម្ពុជាហើយ។ ចំពោះកម្មវិធីប្រឡងកំពូល តារាអាជីពដ៏ល្បី «I am an artist Cambodia» លំដាប់ពិភពលោកនេះ ក៏មានបេក្ខភាព តារាចម្រៀងល្បីៗជាច្រើន របស់ផលិតកម្មហង្សមាស ចូលរួមប្រឡងប្រជែងផងដែរ ដោយលទ្ធផលអ្នកឈ្នះ ជ័យលាភី ក្នុងកម្មវិធីនឹងទទួលបានថវិកាចំនួន១០០លានរៀល៕

ប្រធានាធិបតីតួកគី ចង់ឲ្យកងកម្លាំងប្រដាប់អាវុធ និងទីភ្នាក់ងារស៊ើបការណ៍សម្ងាត់ជាតិ ស្ថិតនៅក្រោមការគ្រប់គ្រងរបស់លោកតែម្នាក់គត់

(អង់ការ៉ា)៖ ប្រធានាធិបតីតួកគី លោក Tayyip Erdogan បានថ្លែងឲ្យដឹងថា លោកចង់កងកម្លាំងប្រដាប់អាវុធ និងទីភ្នាក់ងារស៊ើបការណ៍សម្ងាត់ជាតិ ស្ថិតនៅក្រោមការគ្រប់គ្រងរបស់ប្រធានាធិបតីតែម្នាក់គត់។ នេះបើយោងតាមការចេញផ្សាយ របស់សារព័ត៌មាន Reuters នៅថ្ងៃទី២៩ ខែកញ្ញា។

សេចក្ដីប្រកាសជាផ្លូវនេះ ត្រូវបានធ្វើឡើង ក្រោយពេលដែលលោកប្រធានាធិបតី Erdogan បានជួបប្រជុំជាមួយក្រុមប្រឹក្សាយោធាកំពូល របស់ប្រទេសតួកគី ហើយច្បាប់ថ្មីនេះ អាចនឹងអនុម័តនៅក្នុងពេលឆាប់ខាងមុខនេះ ព្រោះដើម្បីការពារប្រទេសមិនឲ្យរដ្ឋប្រហារយោធា ដូចកាលពីថ្ងៃទី១៥-១៦ ខែកក្កដាកន្លងទៅនេះ។

គួរបញ្ជាក់ផងដែរថា នៅថ្ងៃទី១៥-១៦ ខែកក្កដាកន្លងទៅនេះ មានករណីរដ្ឋប្រហារមួយនៅក្នុងប្រទេសតួកគី ក្នុងគោលដៅទម្លាប់ប្រធានាធិបតីលោក Tayyip Erdogan ប៉ុន្តែការធ្វើរដ្ឋប្រហារត្រូវបានបរាជ័យ ហើយមានមនុស្សជាច្រើននាក់ត្រូវបានចាប់ខ្លួន និងបាញ់ចោល ក្នុងបទសមគំនិត៕

សឿ សុធារ៉ា នាំកូនដើរលេងនៅថៃ ទិញកាបូបតម្លៃរាប់ពាន់ដុល្លារ មិនខ្វល់ពីស្វាមី

(ភ្នំពេញ)៖ តារាសម្ដែងល្បីឈ្មោះ មានរូបសម្រស់ស្រស់សោភា អ្នកនាង សឿ សុធារ៉ា ត្រូវបានគេមើលឃើញថា អ្នកនាងហាក់បាត់ទីផ្សារសម្ដែងសូន្យឈឹង ខណៈដែលតារាថ្មីៗ រះព្រោងព្រាត មានការងារធ្វើស្ទើរតែរកពេលសំរាកគ្មាន ប៉ុន្តែនាងមិនមានអ្វីសម្ដែងជាដុំកំភួនឡើយ ព្រោះតារាសម្ដែងថ្មី សម្ដែងរឿងច្រើនគគោក ឯរូបសម្រស់ក៏ស្រស់សោភាជាងនាង។ ថ្មីៗនេះ អ្នកនាង សឿ សុធារ៉ា បាននាំកូនស្រីបណ្ដូលចិត្ត ដើរលេងនៅក្រៅប្រទេស និងបានទិញសម្ភារប្រើប្រាស់ មានតម្លៃរាប់ពាន់ដុល្លារ។

តារាសម្ដែង អ្នកនាង សឿ សុធារ៉ា ហាក់បង្កប់ភាពមិនសូវសប្បាយចិត្តជាច្រើន ព្រោះបើក្រឡេកមើលពីសង្គមការងារ និងមុខរបររបស់នាង ជាពិសេសសំអាងការ ក៏មិនសូវមានប្រជាប្រិយភាពដូចមុនដូចគ្នា ខណៈកេរ្តិ៍៍ឈ្មោះក៏ដាំក្បាលចុះ ស្ទើរតែហៅលែងឮទៅហើយ។ រយៈកាលប៉ុន្មានឆ្នាំចុងក្រោយនេះ អ្នកនាង សឿ សុធារ៉ា ថ្វីត្បិតតែមើលទៅ រកប្រាក់ចំណូលមិនសូវបានច្រើនក្ដី ប៉ុន្តែអ្នកនាងមិនបានធ្លាក់ខ្លួន ដុនដាបអ្វីឡើយ ពោលកម្រិតជីវភាពរបស់នាង និងគ្រួសារនៅតែមានលក្ខណៈធូរធាដដែល ជាក់ស្ដែងថ្មីៗនេះ អ្នកនាងបាននាំកូនស្រី គឺកុមារី តារា ពិមាន ដើរកំសាន្តក្រៅប្រទេស ទោះបីអវត្តមានសា្វមី គឺលោក សាពូន មីដាដា ក៏ដោយ។

អ្នកនាង សឿ សុធារ៉ា ក្រៅពីនាំកូនស្រីដើរលេងក្រៅប្រទេស នាងក៏បានបង្អួតកាបូបថ្មីម៉ាក «អិលវី» ដែលបានទិញពីប្រទេសថៃ តម្លៃជាង២ពាន់ដុល្លារ ហាក់ប្រាប់ទស្សនិកជនថា អ្នកនាងក៏ជាតារាប្រើសម្ភារៈម៉ាកល្បីៗនឹងគេដែរ។ សឿ សុធារ៉ា មិនត្រឹមតែបានទិញរបស់របរទាំងនោះទេ ថែមទាំងបានថតហាង និង សកម្មភាពទាំងស្រុង ពេលនាងទិញកាបូបតម្លៃថ្លៃទាំងនោះផងដែរ ព្រោះក្នុងសង្គមសិល្បៈបច្ចុប្បន្ន ច្រើនតែផ្ចាញ់ផ្ចាលគ្នា ថាទិញរបស់កូពី គ្មានគុណភាព៕

ប្រភេទកីឡាបាល់ទាត់ ចាប់ផ្តើមមុនគេ ក្នុងកីឡាអូឡាំពិក Rio 2016 នៅប្រេស៊ីល

(ក្រុងរីយ៉ូ)៖ ប្រភេទកីឡាបាល់ទាត់ វិញ្ញាសាបុរស-នារី ក្នុងព្រឹត្តិការណ៍កីឡាអូឡាំពិក រដូវក្តៅ Rio 2016 នៅប្រទេសប្រេស៊ីល ចាប់ផ្តើមប្រកួតមុនគេ គឺនៅថ្ងៃទី០៣ ខែសីហា មុនកម្មវិធីបើកសម្ពោធជាផ្លូវការនៅថ្ងៃទី០៥ សីហានោះ។

យោងតាមគេហទំព័រផ្លូវការរបស់ Rio 2016 បានឲ្យដឹងថា កីឡាបាល់ទាត់ ជាប្រភេទកីឡា១ប្រភេទ ក្នុងចំណោម ២៨កីឡា ដែលដាក់ឲ្យប្រកួតក្នុង Rio 2016 លើកទី៣១នេះនៅក្នុងទឹកដីនៃប្រទេសស្ថិតក្នុងតំបន់អាមេរិកឡាទីន ផ្នែក វិញ្ញាសាកីឡាបាល់ទាត់ផ្នែកបុរស លេងត្រឹមអាយុក្រោម២៣ឆ្នាំ និងវិញ្ញាសាផ្នែកនារី លេងឈុតធំ ជម្រើសជាតិតែម្តង។

សម្រាប់វិញ្ញាសាផ្នែកបុរស ដែលប្រកួតត្រឹមអាយុក្រោម ២៣ឆ្នាំនោះមាន ១៦ក្រុម ចែកចេញជា៤ពូល ដោយក្នុង១ពូល មាន៤ក្រុមក្នុងនោះរួមមាន ពូល A៖ អ៊ីរ៉ាក់ ដាយណឺម៉ាក អាហ្វ្រិកខាងត្បូង និង U-23 របស់ម្ចាស់ផ្ទះប្រេស៊ីល។ ពូល B៖ ស៊ុយអែត កូឡុំប៊ី នីហ្សេរីយ៉ា និងជប៉ុន។ ពូល C៖ ម៉ិចស៊ិក ហ្វីជី អាល្លឺម៉ង់ និងកូរ៉េខាងត្បូង និងពូល D៖ ហុងឌុយរ៉ាស់ អាល់ហ្សេរី ព័រទុយហ្គាល់ និងអាហ្សង់ទីន ដោយចាប់ផ្តើមប្រកួតសន្សំពិន្ទុនៅរាត្រីថ្ងៃទី០៤ ខែសីហាតទៅហើយ។

ទន្ទឹមគ្នានោះដែរ សម្រាប់កីឡាបាល់ទាត់ វិញ្ញាស្រ្តីវិញ មាន ១២ក្រុម ចែកចេញជា៣ពូល ដោយក្នុង១ពូល មាន៤ក្រុម ចាប់ផ្តើមប្រកួតជម្រុះសន្សំពិន្ទុមុនគេ ថ្ងៃទី០៣ ខែសីហា ផ្តើមចេញពីពូល E៖ ស៊ុយអែត អាហ្វ្រិកខាងត្បូង ចិន និងម្ចាស់ផ្ទះប្រេស៊ីល។ ពូល F៖ កាណាដា អូស្រ្តាលី ហ្ស៊ីមបាវ៉េ និងអាល្លឺម៉ង់ និងពូល G៖ អាមេរិក ញូវហ្សេឡេន បារាំង និង កូឡុំប៊ី៕

សូមជម្រាបថា កម្ពុជា ក៏មាន៤ប្រភេទកីឡា ស្មើនឹង៦អត្តពលិក សម្រាប់ចូលរួមប្រកួតប្រជែងដណ្តើមមេដាយនឹងគេ ដែរមាន កីឡាតេក្វាន់ដូ ហែលទឹក ចំបាប់ និងកីឡាអត្តពលកម្ម (រត់ប្រណាំង) ដែលបានចេញដំណើរកាលពីយប់ថ្ងៃ ព្រហស្បតិ៍ ទី២៨ ខែកក្កដា ឆ្នាំ២០១៦ ក្រោមការដឹកនាំរបស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូ ឡាំពិកកម្ពុជា (NOCC)៕

ខេមរៈ សិរីមន្ត និង នី រតនា នាំយកថវិកា ១៥,០០០ដុល្លារ បានមកពីការសម្ដែងនៅកូរ៉េ បរិច្ចាគដល់មន្ទីរពេទ្យគន្ធបុប្ផា

(ភ្នំពេញ)៖ តារាចម្រៀង ប្រចាំផលិតកម្មសាន់ដេ លោក ខេមរៈ សិរីមន្ត និងអតីតម្ចាស់ជ័យលាភី ក្នុងកម្មវិធីប្រឡងចម្រៀងលំដាប់ថ្នាក់ ពិភពលោក Cambodian Idol លោក នី រតនា កាលពីរសៀលថ្ងៃទី២៨ ខែកក្កដា ឆ្នាំ២០១៦ម្សិលមិញ បាននាំយកថវិកាសប្បុរជន ចំនួន១៥,០០០ដុល្លារ ទៅឧបត្ថម្ភដល់មន្ទីរពេទ្យគន្ធបុប្ផា ដែលជាមន្ទីរពេទ្យជួយព្យាបាលកុមារ ក្រីក្រធំជាងគេ នៅក្នុងប្រទេសកម្ពុជា។

បើតាមការឲ្យដឹង ពីតារាចម្រៀងលោក ខេមរៈ សិរីមន្ត និងលោក នី រតនា បាននិយាយថា ថវិកាចំនួន ១៥,០០០ដុល្លារ ដែលពួកលោក បាននាំយកទៅប្រគល់ជូន មន្ទីរពេទ្យគន្ធបុប្ផានេះ គឺជាថវិកា ដែលបានមកពីការរ៉ៃអង្គាស ពីបងប្អូនខ្មែររស់នៅប្រទេសកូរ៉េ អំឡុងពេលចេញទៅច្រៀង និងសម្តែងនៅទីនោះ កាលពីពេលថ្មីៗកន្លងមកនេះ។

តារាចម្រៀងចំណូលថ្មី របស់ផលិតកម្មហង្សមាស លោក នី រតនា បាននិយាយទៀតថា «ថ្ងៃនេះខ្ញុំ ក៏ដូចជាបងៗ ដែលបានទៅសម្ដែងនៅឯប្រទេសកូរ៉េ កាលពីប៉ុន្មានថ្ងៃមុននោះ រួមនឹងក្រុមហ៊ុន ធារ៉ា ប៊ីយូធី បានពាំនាំនូវថវិកាបន្តិចបន្តួច យកមកជូនដល់មន្ទីរពេទ្យគន្ធបុបា្ផ ដើម្បីជួយទៅដល់ ប្អូនៗកុមារ ដែលកំពុងតែមានជំងឺ ក៏ដូចជាខ្វះខាតនូវថវិកាខ្លះៗ ហើយថ្ងៃនេះដែរ ខ្ញុំពិតជាសប្បាយចិត្តខ្លាំងមែនទែន ដែលខ្ញុំបានចូលរួមចំណែក ជួយដល់មន្ទីរពេទ្យ ក៏ដូចជាបានជួយទៅដល់សង្គមផងដែរ!»។

សូមជម្រាបជូនថា មន្ទីរពេទ្យគន្ធបុប្ផា គឺជាមន្ទីរពេទ្យធំជាងគេ នៅប្រទេសកម្ពុជា ដែលមានគោលការណ៍មនុស្សធម៌ ផ្តោតសំខាន់លើការព្យាបាល និងសេវាសុខភាព ដោយឥតគិតថ្លៃសម្រាប់កុមារនៅកម្ពុជា អស់រយៈពេលជាច្រើនឆ្នាំមកហើយ ក្រោមជំនួយថវិកា ពីរាជរដ្ឋាភិបាលកម្ពុជា និង រដ្ឋាភិបាលប្រទេសស្វីស ព្រមទាំងសប្បុរសជនទាំងក្នុង និងក្រៅប្រទេស។ មន្ទីពេទ្យនេះបានដើរតួនាទីយ៉ាងសំខាន់ និងជាកន្លែងផ្តល់ក្តីសង្ឃឹម ដល់កុមារនៅប្រទេសកម្ពុជា ជាពិសេសកុមារក្រីក្ររាប់ម៉ឺននាក់ ដែលឪពុកម្តាយពួកគេទាំងនោះ ខ្វះលទ្ធភាព ដើម្បីស្វែងរកសេវាព្យាបាលជំងឺដល់កូនៗ៕

ចង់សន្សំលុយសុខចិត្តទិញអង្ករថោកញ៉ាំ ទីបំផុតត្រូវប៉ូលិសផាកអស់ ៤០០ដុល្លារទទេ ព្រោះដឹកហួសចំណុះ

(អង់គ្លេស)៖ បុរសជនជាតិអង់គ្លេសម្នាក់ ខំសន្សំលុយមិនហ៊ានទិញរបស់ណាថ្លៃនឹងគេ ដោយថ្ងៃមួយគាត់បានទិញអង្ករតម្លៃថោក ទាំងការ៉ុងដាក់ក្នុងរថយន្តឡើងទ្រុឌ តែមិនសំណាងបុរសនេះ ក៏បានបើករថយន្តជួបនឹងប៉ូលិសក៏ហៅឈប់ ត្រួតពិនិត្យ ហើយពួកគេបានឃើញបុរសនោះ បើកបរមើលទៅងាយរងគ្រោះថ្នាក់បំផុត ទើបឃាត់ខ្លួនគេណែនាំសិន មុននឹងឲ្យបន្តដំណើរ។

ក្រុមប៉ូលិសមួយចំនួនទៀត ត្រូវបានដាក់ល្បាតនៅផ្លូវ Cambridgeshire និង Hertfordshire ក៏ប្រទះឃើញរថយន្តបុរសនេះ ជិះកាត់ទៀត តែដោយមានការសង្ស័យ ឃើញរថយន្ត ហាក់ខុសប្រក្រតីក៏ហៅឲ្យ ឈប់រួចពិនិត្យ ឃើញមានបាវអង្ករផ្លាស្ទិកជាច្រើន នៅក្នុងរថយន្តទើបសាកសួរម្ចាស់ តែគេឆ្លើយថា អង្ករថោកទើប សម្រេចទិញវា យកមកស្តុកទុកដោយមួយបាវ មានតម្លៃត្រឹមតែ២០ដុល្លារប៉ុណ្ណោះ។

នៅថ្ងៃកើតហេតុ ប៉ូលិសនៅផ្លូវ Dunstable បានបញ្ឈប់រថយន្តបុរស មិនស្គាល់អត្តសញ្ញាណនេះ ដោយណែនាំឲ្យដកបាវអង្ករចេញខ្លះ កុំឲ្យដឹកច្រើនពេក តែគេមិនស្តាប់រួចបន្តដំណើរទៅមុខ មិនបានប៉ុន្មានក៏ជួបប៉ូលិស នៅកន្លែងផ្សេង ហើយក៏ត្រូវបានហៅឲ្យឈប់ជាលើកទីពីរ និងនាំទៅកាន់ប៉ុស្តិ៍ដោយ ផាកពិន័យ៤០០ដុល្លារ ពីបទបើកបរក្នុងស្ថានភាពគ្រោះថ្នាក់ ព្រោះគេបើករថយន្ត ដឹកអង្ករដល់ទៅ ៨០០គីឡូក្រាមឯណោះ៕

ខឹងពន្យារពេលហោះហើរ អ្នកដំណើរម្នាក់ស្ទុះទៅវាយមន្ត្រីប៉ូលិស នៅព្រលានយន្តហោះ ទាំងកម្រោល

(អាល្លឺម៉ង់)៖ បុរសម្នាក់ត្រូវចាប់ខ្លួន ដោយចោទពីបទបង្ករបួសស្នាម បន្ទាប់ពីវាយមន្ត្រីប៉ូលិសច្រើននាក់ នៅព្រលានយន្តហោះ ព្រោះតែផ្ទុះកំហឹងរឿងពន្យារពេលជើងហោះហើរ។

ហេតុការណ៍នេះកើតឡើង នៅប្រទេសអាល្លឺម៉ង់ តាមរូបភាពវីដេអូដែលគេថតយកទៅបង្ហោះ បានបង្ហាញឲ្យឃើញបុរសបង្ក ហេតុដែលគេដឹងថា ជាជនជាតិម៉ូស្លីម ហើយជននេះបានស្ទុះទៅទាត់ និងច្រានសមត្ថកិច្ចពីរនាក់ នៅឯតុត្រួតពិនិត្យ បន្ទាប់ពីកើតអារម្មណ៍អន់ចិត្ត ពេលឃើញសន្តិសុខសុំឆែកមុខប្រពន្ធ ដោយសារនាងបិទជិត ព្រមទាំងខឹង រឿងពន្យារពេលជើងហោះ ហើរផងដែរ។

ប៉ូលិសនិយាយថា អ្នកដំណើររាប់ពាន់នាក់ដែលត្រូវរង់ចាំ នៅព្រលានយន្តហោះដូចគ្នា ព្រោះតែអាកាសធាតុមិនល្អ តែបែរជាធ្វើឲ្យជនសង្ស័យខឹង ស្រាប់តែស្ទុះទៅរករឿងពួកគេ ហើយក៏បានបង្ករបួសស្នាម លើប៉ូលិសខ្លះបណ្តាលឲ្យរងរបួសតិចតួចដែរ៕

វិធីសាស្ត្រងាយៗ ១០យ៉ាងជួយបំបាត់ការឈឺចាប់ពេលសម្រាលកូន

វិធីទាំងនេះជួយឱ្យអ្នកមានអារម្មណ៍សុខស្រួល គ្មានការឈឺចាប់ពេលសម្រាលកូន។ ដំបូង សម្រេចថា អ្នកណា ហើយអ្វីខ្លះត្រូវនៅក្បែរអ្នក។ បន្ទាប់មករៀនពីអ្វីដែលខ្លួនប្រាណ និងចិត្តរបស់អ្នកអាចធ្វើបាន ក្នុងកំឡុងពេលកន្ត្រាក់ស្បូន។ អ្នកនឹងមានការភ្ញាក់ផ្អើលចំពោះសមត្ថភាពរបស់អ្នក ធ្វើឱ្យអ្នកស្ថិតក្នុងតំបន់សុខស្រួល។

១. រកកន្លែងបន្ធូរអារម្មណ៍

អ្នកនឹងមានអារម្មណ៍ថា សុវត្ថិភាពពេលឆ្លងទន្លេ។ វាគួរតែមានកន្លែងដើរ និងងូតទឹក ហើយក៏មានគ្រឿងសង្ហារឹមផ្សេងៗ និងឧបករណ៍ពង្រឹងចលនា និងបំបាត់ការឈឺចាប់៖ ក្បាលចាក់ស៊ីឌី, កៅអីយោល, បាល់ធំ, កៅអីខ្លី, របារច្របាច់ និងគ្រែទន់។ អ្នកអាចព្យាយាមធ្វើឥរិយាបថផ្សេងៗ។ ការថែទាំពីវេជ្ជសាស្ត្រ ជារឿងមួយសំខាន់ ប្រសិនបើមានបញ្ហាកើតឡើង។

២. ជ្រើសរើសក្រុមមនុស្សឱ្យបានត្រឹមត្រូវ

អ្នកជំនាញ ឆ្មបមានសមត្ថភាព វេជ្ជបណ្ឌិត គិលានុដ្ឋាយិកា ដៃគូ គូស្នេហ៍អាចជួយដល់អ្នក ពេលឈឺពោះសម្រាលកូន។ ពេលអ្នកចេះអត់ធ្មត់ និងគោរព នោះភាពតានតឹង និងភាពរាំងស្ទះនឹងថយចុះ ហើយអ្នកអាចសម្រាលបានយ៉ាងងាយ។

៣. សិក្សាពីការសម្រាលកូន

ស្វែងយល់ពីអ្វីគ្រប់យ៉ាងដែលអ្នកអាចរកបានពីសៀវភៅ ទស្សនាវដ្តី វេបសាយ វីដេអូ សាលារៀន មន្ទីរពេទ្យ និងការពិភាក្សាជាមួយអ្នកផ្តល់ការថែរក្សាសុខភាព គ្រួសារ និងមិត្តភក្តិរបស់អ្នក។

៤. បញ្ចេញភាពភ័យខ្លាចរបស់អ្នក

តើអ្នកខ្លាចការសម្រាលកូន ម្ជុល ថ្នាំ ឬបាត់បង់ការគ្រប់គ្រងលើខ្លួនឯងណាស់មែនទេ?

និយាយប្រាប់ដល់អ្នកជំនាញ និងមិត្តស្និតស្នាលរបស់អ្នក។ ការបញ្ចេញពីក្តីព្រួយបារម្ភអាចជួយកាត់បន្ថយ ក៏ដូចជាដំណោះស្រាយភាពភ័យខ្លាចរបស់អ្នក។

៥. អនុវត្តចលនាដង្ហើម

ដកដង្ហើមយឺតៗវែងៗ ក្នុងពេលកន្ត្រាក់ស្បូន។ បញ្ចេញភាពតានតឹង ដោយបញ្ចេញខ្យល់ដង្ហើមចេញ និងព្យាយាមស្រែក។ ហើយក៏ព្យាយាមដកដង្ហើមញាប់រៀងរាល់ ២-៣វិនាទីម្តង(ឱ្យបាន ២០-៣០ដងក្នុង ១នាទី)។ ប្រសិនបើអ្នកបាត់បង់ចលនាដង្ហើម គូស្នេហ៍អ្នកត្រូវតែជួយបង្កើនវាឡើងវិញ ដោយសម្លឹងមើលភ្នែក ធ្វើចលនាដៃ ឬក្បាល ឬដោយការនិយាយជាមួយអ្នក។

៦. ប្រើការស្រមើស្រមៃ និងការសម្លឹងមើល

ផ្តោតអារម្មណ៍ទៅលើអ្វីមួយដែលធ្វើឱ្យអ្នកសប្បាយចិត្ត(ដូចជាមុខគូស្នេហ៍អ្នក រូបភាពស្អាតៗ ឬរបស់ដែលអ្នកពេញចិត្ត) ដើម្បីកាត់បន្ថយការឈឺចាប់។ ស្តាប់តន្ត្រី ស្តាប់សម្លេងទឹករលកសមុទ្រ និងស្រមៃថាខ្លួនអ្នកកំពុងនៅក្នុងបរិយាកាសល្អ។

៧. ងូតទឹកក្តៅអ៊ុនៗ

ទឹកក្តៅអ៊ុនៗអាចជួយបន្ធូរអារម្មណ៍ និងជួយឱ្យឆាប់បានសម្រាល។

៨. រក្សាការធ្វើចលនាជានិច្ច

បញ្ចេញសកម្មភាពឱ្យបានច្រើនតាមដែលអ្នកអាចធ្វើបាន។ ដើរ ផ្អៀងខ្លួន យោល និងអង្គុយ។ ឥរិយាបថខ្លះនឹងធ្វើឱ្យកាន់តែមានភាពងាយស្រួល។

៩. ស្អំទឹកត្រជាក់ ឬទឹកក្តៅ

ដាក់កញ្ចប់ទឹកក្តៅស្អំលើក្បាលពោះ ក្រលៀន ខ្នង ឬស្មាក្នុងពេលសម្រាលកូន។ ថង់ទឹកកកអាចជួយកាត់បន្ថយត្រង់តំបន់ឈឺចាប់។ កន្សែងត្រជាក់ជួយកម្ចាត់ញើសលើផ្ទៃមុខ ដើមទ្រូង ឬក។

១០. ការម៉ាស្សា ឬស្ទាបអង្អែលថ្នមៗ

មិនថាមានអ្នកណាម្នាក់កាន់ដៃ អង្អែលប៉ះថ្ពាល់ សក់ ឬស្មារបស់អ្នកទេ វាអាចជួយលើកទឹកចិត្ត ផ្តល់ការថែទាំ និងកម្លាំងចិត្តដល់អ្នក។

ប្រាប់គូស្នេហ៍អ្នកឱ្យជួយម៉ាស្សាដោយប្រើឡេ ឬប្រេង៕

មូលហេតុដែលធ្វើឱ្យទារកស្លាប់ភ្លាមៗមួយរំពេច

អ្នកប្រហែលជាធ្លាប់ឃើញថា តាមធម្មតា ម្តាយថ្មីថ្មោងតែងតែក្រោកភ្លាមៗនៅពេលពាក់កណ្តាលអាធ្រាត្រ និងពិនិត្យមើលខ្យល់ដង្ហើមរបស់កូន។ ប្រសិនបើអ្នកជាម្តាយ អ្នកក៏មានការព្រួយបារម្ភដូចគ្នាដែរ។ នេះដោយសារតែយើងទាំងអស់គ្នាធ្លាប់លឺរឿងទារកស្លាប់ភ្លាមៗដោយគ្មានមូលហេតុ។ នេះជាការស្លាប់មួយរំពេចរបស់ទារក (ក្រោមអាយុ ១ខួប) ដែលមិនអាចពន្យល់បាន ក្នុងពេលគេកំពុងគេងលក់។

ហេតុផលដែលធ្វើឱ្យទារកស្លាប់ភ្លាមៗ គ្មានភាពច្បាស់លាស់ឡើយ។ បើទោះបីជាវេជ្ជបណ្ឌិតមានភស្តុតាងពិតខ្លះៗក៏ពិតមែន តែសេចក្តីស្លាប់ភ្លាមៗរបស់ទារកនៅតែជាភាពច្របូកច្របល់ធំបំផុត។ ករណីភាគច្រើន អ្នកមិនអាចប្រាកដពីមូលហេតុអ្វីខ្លះដែលបណ្តាលឱ្យទារកស្លាប់ភ្លាមៗបានឡើយ។ តែទោះបីជាយ៉ាងណា បើសិនជាអ្នកដឹងពីអ្វីដែលធ្វើឱ្យទារកស្លាប់ភ្លាមៗ អ្នកត្រូវមានការប្រុងប្រយ័ត្នទុកជាមុន។

នេះជាហេតុធ្វើឱ្យយើងព្យាយាមបង្ហាញពីរឿងរ៉ាវមួយចំនួនដែលបណ្តាលឱ្យទារកស្លាប់ដោយគ្មានមូលហេតុ។ គ្មានវិធីណាមួយ អ្នកអាចការពារទារកពីការស្លាប់ភ្លាមៗនេះបានទេ។ អ្វីដែលអ្នកអាចធ្វើបាន គឺភាពប្រុងប្រយ័ត្ន ដូច្នេះអាចជួយកាត់បន្ថយឱកាស។ អ្នកមិនត្រូវបន្ទោសខ្លួនឯងថា មិនបានព្យាយាមធ្វើឱ្យអស់ពីសមត្ថភាព។

ហេតុនេះ ខាងក្រោមនេះជាមូលហេតុនៃការស្លាប់មួយរំពេចរបស់ទារក៖

ថប់ដង្ហើម

មូលហេតុទូទៅបំផុតនៃការស្លាប់របស់ទារកមួយរំពេចក្នុងពេលគេងលក់គឺ ការថប់ដង្ហើម។ ពេលខ្លះ ទារកគេងផ្កាប់មុខ។ នេះបណ្តាលឱ្យដង្ហើមរបស់គេបញ្ចេញកាបូនឌីអុកស៊ីតកាន់តែច្រើនឡើង ធ្វើឱ្យថប់ដង្ហើមស្លាប់។ គេនៅតែខ្វះសភាវគតិនឹងភ្ញាក់ នៅពេលថប់ដង្ហើម។

ការស្ទះដង្ហើម

ទារកជាច្រើនត្រូវបានម្តាយរុំភួយ ឬក្រណាត់កន្សែងយ៉ាងកក់ក្តៅ មុនពេលដាក់ឱ្យគេង។ ក្នុងករណី ទារកគ្របច្រមុះក្នុងពេលគេង វាអាចកាត់បន្ថយខ្យល់អុកស៊ីសែន ធ្វើឱ្យទារកដាច់ខ្យល់។ នេះជាហេតុដែលអ្នកត្រូវប្រាកដថា ច្រមុះកូនរបស់អ្នកមិនត្រូវបានអ្វីមួយគ្របពីលើ នៅពេលគេគេងពេញមួយយប់។

ចាល់ទឹកដោះ

ទារកភាគច្រើនត្រូវបានបំបៅ រួចដាក់ឱ្យគេង។ ឥលូវនេះ ទារកមានទម្លាប់មួយញ៉ាំទឹកដោះគោសិន រួចបានគេង។ ប្រសិនបើទារកមិនអាចទប់ទល់នឹងការចាល់ទឹកដោះចេញ នៅពេលគាត់គេងបានទេ នោះទារកអាចស្ទះដង្ហើម។

កំណើនឡើងនៃការលូតលាស់កោសិកាសរសៃប្រសាទ

ជួនកាល ប្រព័ន្ធសរសៃប្រសាទរបស់ទារកមិនទាន់កើតឡើងក្នុងវ័យនេះទេ។ ប្រសិនបើរំញោចប្រព័ន្ធសរសៃប្រសាទដំណើរការមិនបានល្អ បេះដូងទារកនឹងឈប់ដំណើរការ។ នេះដោយសារបេះដូងមិនអាចទទួលសញ្ញាពីខួរក្បាលបាន។

ការឡើងកម្តៅខ្លាំង

ពេលដែលគេប្រាប់ថា ឱ្យរក្សាភាពកក់ក្តៅដល់កូន មិនមែនមានន័យថាអ្នកត្រូវផ្តល់កម្តៅឱ្យកូនខ្លាំងពេកទេ។ ប្រសិនបើកម្តៅក្នុងខ្លួនរបស់ទារកកើនឡើងហួសកំណត់ វាអាចបណ្តាលឱ្យទារកស្លាប់មួយរំពេច។ កុំឱ្យទារកគេងទាំងពាក់មួក និងស្រោមជើង។

ត្រជាក់

ពេលខ្លះ ទារកអាចរងារ ដោយសារតែភាពត្រជាក់។ ជាធម្មតា បញ្ហានេះកើតឡើងនៅពេលនៅខាងក្រៅ ហើយមិនបានដណ្តប់ភួយឱ្យបានត្រឹមត្រូវ៕

Thursday, July 28, 2016

វិធីកែទម្រង់រូបរាងក្បាលរបស់ទារកដែលខុសប្រក្រតី

សម្រាប់អ្នកដែលមានកូនកើតមកធម្មតា គិតថាប្រធានបទមួយនេះគួរឱ្យអស់សំណើច។ ប៉ុន្តែវាមិនមែនដូច្នោះទេ។ ជួនកាល ទម្រង់ក្បាលកូនរបស់អ្នកអាចជាក្តីព្រួយបារម្ភមួយ។ មនុស្សគ្រប់គ្នាមានទម្រង់ក្បាលខុសៗគ្នា។ អ្នកខ្លះមានក្បាលរាងពងក្រពើ ខ្លះមានក្បាលរាងមូល និងខ្លះទៀតមានក្បាលរាងការ៉េ។

ប៉ុន្តែ ទារកមួយចំនួនមានទម្រង់ក្បាលខុសធម្មតា។ មានហេតុផលមួយចំនួនដែលធ្វើឱ្យក្បាលទារកក្លាយជាបែបនេះ។

ការសម្រាលកូនដោយប្រើតំបៀត

ការសម្រាលកូនប្រភេទនេះជារឿងមួយចាំបាច់ នៅពេលទារកជាប់នៅក្នុងបំពង់ស្បូន។ ប្រើតំបៀតកៀបក្បាលទារក រួចទាញចេញ។ វិធីនេះធ្វើឱ្យក្បាលទារកកាន់តែវែងឡើង។

ក្បាលទារកក៏មានស្លាកស្នាមត្រង់កន្លែងដែលប្រើតំបៀតផងដែរ។

សម្ពាធក្នុងបំពង់ស្បូន

ប្រសិនបើទារកជាប់បន្តិចនៅក្នុងបំពង់ស្បូន ទម្រង់ក្បាលអាចរាបស្មើ។ ជាធម្មតា បញ្ហានេះកើតឡើងនៅពេលអ្នកពិបាកសម្រាលកូន។

ការប្រើកម្លាំងបាយ

ទារកប្រៀបដូចជាកូនសំឡីទន់មួយ។ ការចាប់កាន់ពីអ្វីមួយរឹងអាចធ្វើឱ្យទម្រង់ក្បាលទារកប្រែប្រួល។ ដូច្នេះប្រសិនបើកូនអ្នកប្រឈមនឹងបញ្ហាដូចខាងលើ អ្នកអាចប្រើវិធីកែទម្រង់ក្បាលកូននៅផ្ទះដោយខ្លួនឯងបាន។

ខ្នើយទន់

វិធីកែទម្រង់ក្បាលរបស់ទារកតាមចាស់បុរាណគឺ ត្រូវឱ្យកូនគេងលើខ្នើយទន់ធ្វើពីសំឡីគ។ ខ្នើយទន់មែន តែមានសម្ពាធត្រង់ចំណុចមួយដែលត្រឹមត្រូវ។ នេះជាវិធីកែទ្រង់ទ្រាយក្បាលកូនរបស់អ្នក។

ផ្លាស់ប្តូរឥរិយាបថការគេងរបស់កូន

ប្រសិនបើទារកគេងបែរទៅតែម្ខាងពេញមួយយប់ ក្បាលអាចនឹងរាបស្មើទៅតែម្ខាង។ ដើម្បីការពារពីបញ្ហានេះ អ្នកត្រូវឧស្សាហ៍ប្តូរឥរិយាបថនៃការគេងរបស់កូនអ្នកពីម្ខាងទៅម្ខាងទៀត ពេលគាត់កំពុងគេង។

បញ្ឈប់កូនអ្នកពីការសម្លឹងមើលទីតាំងតែមួយគ្រប់ពេលវេលា

នៅពេលទ្រង់ទ្រាយក្បាលទារកមិនស្មើគ្នា ទារកនឹងព្យាយាមសម្លឹងមើលទៅទីតាំងតែមួយគ្រប់ពេលទាំងអស់។ អ្នកត្រូវព្យាយាមបង្វែអារម្មណ៍របស់កូនឱ្យងាកមករក តាមរយៈបន្លឺសម្លេង ឬនិយាយទៅកាន់កូន ហើយត្រូវប្រាកដថា កូនរបស់អ្នកបានសម្លឹងមើលគ្រប់ទីតាំងទាំងអស់៕

សារធាតុចិញ្ចឹមសំខាន់ៗដែលក្មេងកំពុងលូតលាស់ត្រូវការជាចាំបាច់

អាហារដើរតួនាទីសំខាន់ណាស់ចំពោះការលូតលាស់ និងធំធាត់របស់ក្មេង។ ប្រសិនបើអ្នកមិនទាន់បានដឹងពីតម្រូវការសារធាតុចិញ្ចឹមទេនោះ អ្នកប្រហែលជាមិនបានផ្តល់អាហារត្រឹមត្រូវឱ្យកូនរបស់អ្នកឡើយ។

ក្នុងដំណាក់កាលលូតលាស់ កូនរបស់អ្នកត្រូវការសារធាតុចិញ្ចឹមសំខាន់ៗគ្រប់យ៉ាង។ ពេទ្យប្រចាំគ្រួសារ ឬអ្នកជំនាញផ្នែកចំណីអាហារតែងតែអាចជួយដល់អ្នកបាន ប៉ុន្តែអ្វីដែលសំខាន់អ្នកត្រូវប្រាកដថា អ្នកបានផ្តល់អាហារសុខភាពដែលមានផ្ទុកជាតិស្ករ ប្រូតេអ៊ីន និងសារធាតុខនិជដល់កូនអ្នកបានយ៉ាងទៀងទាត់។

ខាងក្រោមនេះជាសារធាតុចិញ្ចឹមចាំបាច់មួយចំនួន អ្នកត្រូវតែឱ្យកូនញ៉ាំ៖

ជាតិកាល់ស្យូម

កាល់ស្យូម ជាសារធាតុខនិជសំខាន់បំផុត សម្រាប់ឱ្យធ្មេញ និងឆ្អឹងលូតលាស់។ ក្មេងត្រូវការវា ជាពិសេសក្នុងវ័យកំពុងលូតលាស់។ ស្លឹកបន្លែ ផលិតផលធ្វើពីទឹកដោះគោ និងត្រីសាល់ម៉ុង ជាប្រភពដ៏ល្អនៃជាតិកាល់ស្យូម។

ជាតិដែក

កង្វះជាតិដែកអាចជាភាពគ្រោះថ្នាក់មួយ ព្រោះកោសិកាឈាមត្រូវការជាតិដែក។ ឈាម ជាអ្នកផ្គត់ផ្គង់ខ្យល់អុកស៊ីសែន និងសារធាតុចិញ្ចឹមផ្សេងទៅឱ្យគ្រប់ផ្នែកនៃរាងកាយ។ ហេតុនេះ អ្នកគួរឱ្យកូនញ៉ាំស្ពៃក្តោប ស្ពៃខ្មៅ និងសាច់ក្រហម។

វីតាមីន B១២

រាល់វីតាមីនទាំងអស់ដែលឋិតក្នុងក្រុម B សុទ្ធតែសំខាន់ចំពោះប្រព័ន្ធរំលាយអាហារ។ ជាពិសេស វីតាមីន B១២ជាតម្រូវការរបស់ក្មេងកំពុងលូតលាស់។ វត្តមានរបស់វីតាមីន Bនេះច្រើនមាននៅក្នុងស៊ុត និងសាច់មាន់។

វីតាមីន D

រាងកាយរបស់អ្នកត្រូវការវីតាមីន D ដើម្បីស្រូបយកជាតិកាល់ស្យូមបានល្អ។ ដូច្នេះ ដើម្បីឱ្យឆ្អឹងរឹងមាំ អ្នកត្រូវការវីតាមីន Dជាចាំបាច់។ ត្រីស្បៃកា ត្រីសាល់ម៉ុង និងស៊ុតមានផ្ទុកនូវវីតាមីនមួយនេះ។

វីតាមីន E

វីតាមីននេះអាចជួយពង្រឹងប្រព័ន្ធភាពស៊ាំ និងការពារក្មេងពីជំងឺផ្សេងៗ។ ហើយវាក៏អាចជួយសម្រួលដល់ចរាចរណ៍ឈាមផងដែរ។ វីតាមីននេះមាននៅក្នុងគ្រាប់ផ្កាឈូករ័ត្ន គ្រាប់អាល់ម៉ុង និងគ្រាប់ធញ្ញជាតិមួយចំនួនទៀត៕

រឿងមិនពិតមួយចំនួនទាក់ទងនឹងការចិញ្ចឹមទារកដែលអ្នកមិនគួរជឿ

រឿងមិនពិតភាគច្រើនរបស់ទារកកើតចេញពីទំនៀមទម្លាប់ និងសាសនាដែលយើងអនុវត្តតាមតាំងពីបុរាណកាលមក។ ហើយរឿងមិនពិតមួយចំនួនទៀតកើតចេញពីខ្លួនយើងជាអ្នកបង្កើត។ ដើម្បីឱ្យប្រាកដថា អ្នកចិញ្ចឹមទារកបានត្រឹមត្រូវ អ្នកត្រូវជឿលើរឿងមិនពិតមួយចំនួនរបស់ទារក។

បើសិនជាអ្នកទើបតែសម្រាលទារក ព្យាយាមគេចចេញពីរឿងមិនពិតទូទៅទាក់ទងនឹងការចិញ្ចឹមទារកខាងក្រោមនេះ៖

រឿងមិនពិតទី ១

អ្នកមិនគួរបំបៅដោះកូននៅ ៣ថ្ងៃដំបូង។ នេះមិនមែនត្រឹមតែមិនត្រឹមត្រូវប៉ុណ្ណោះទេ តែក៏ជាការបង្កភាពគ្រោះថ្នាក់ផងដែរ។ រយៈពេល ៣ថ្ងៃដំបូងក្រោយពេលឆ្លងទន្លេ សុដន់របស់អ្នកនឹងបញ្ចេញសារធាតុរាវពណ៌លឿង ដែលគេហៅថា ទឹកដោះដំបូង។ វប្បធម៌មួយចំនួន បានហាមអ្នកមិនឱ្យបំបៅដោះកូនទើបនឹងកើត ព្រោះសុដន់អ្នកកំពុងបញ្ចេញទឹកដោះដំបូងនេះ។ ប៉ុន្តែកូនតូចរបស់អ្នកនឹងបាត់បង់សារធាតុចិញ្ចឹម ព្រោះទឹកដោះដំបូងនេះជួយជម្រុញដល់ប្រព័ន្ធភាពស៊ាំរបស់ទារក។

រឿងមិនពិតទី ២

កូនរបស់អ្នកមានកែវភ្នែកពណ៌ខៀវ។ សោកស្តាយចំពោះអ្នកផង តែទារកជាច្រើនតែងតែមានកែវភ្នែកពណ៌ខៀវ ឬពណ៌ត្នោតបែបនេះ ពេលដែលពួកគេកើតចេញមក។ មូលហេតុនេះដោយសារកញ្ចក់ភ្នែករបស់ទារកទើបនឹងកើតលូតលាស់មិនទាន់បានពេញលេញ។ ពណ៌កែវភ្នែករបស់កូនអ្នកនឹងផ្លាស់ប្តូរបន្តិចម្តងៗ នៅពេលកញ្ចក់ភ្នែកលូតលាស់ពេញលេញ។ ដល់គេមានអាយុ ៦ខែ ពណ៌កែវភ្នែករបស់គេនឹងប្រែជាពណ៌ខ្មៅវិញតាមបែបធម្មជាតិ។

រឿងមិនពិតទី ៣

ប្រេងម៉ាស្សាពិតជាចាំបាច់ណាស់ចំពោះទារកទើបនឹងកើត។ តាមគំនិតរបស់អ្នកគិតថា ក្រពេញជាតិប្រេងរបស់ទារកទើបនឹងកើតមិនទាន់លូតលាស់នៅឡើយទេ។ ដូច្នេះ ប្រេងទាំងអស់ដែលអ្នកលាបលើស្បែកគេ នឹងគ្មានបានប្រយោជន៍។ ជាការពិតណាស់ រឿងមិនពិតនេះអាចបណ្តាលឱ្យទារកកើតមុន ព្រោះជាតិប្រេងមិនត្រូវបានស្រូបយកដោយកោសិកាស្បែក។

រឿងមិនពិតទី ៤

ការគេងហាលថ្ងៃនឹងជួយឱ្យឆ្អឹងទារករឹងមាំ។ តែតាមការពិត វានឹងធ្វើឱ្យកូនតូចរបស់អ្នកឈឺ។ តាមជំនឿរបស់ជនជាតិឥណ្ឌា ការទុកឱ្យកូនគេងហាលថ្ងៃក្រោយពេលម៉ាស្សាប្រេងរួច អាចជួយឱ្យឆ្អឹងស្រូបយកវីតាមីន D។ ប៉ុន្តែកម្តៅ និងពន្លឹព្រះអាទិត្យអាចផ្តល់ផលអាក្រក់ច្រើនជាងផលល្អ។

រឿងមិនពិតទី ៥

ការស្រែកយំនឹងធ្វើឱ្យទារកហត់នឿយ។ តែផ្ទុយទៅវិញ ការយំធ្វើឱ្យបេះដូងទារកកាន់តែរឹងមាំ។ នៅពេលទារកស្រែកហាមាត់យំធំៗ បានន័យថា គេកំពុងតែប្រើប្រាស់សួតបានពេញលេញបំផុត។ ការយំធ្វើឱ្យទារកមានសុខភាពល្អ។ ដូច្នេះកុំប្រញាប់លួងកូនឆាប់ពេក ពេលគេយំ។ ហើយការស្រែកយំនេះក៏ជួយពង្រឹងសម្លេងទារកឱ្យកាន់តែច្បាស់ឡើងថែមទៀតផង។

ប្រសិនបើអ្នកទើបតែក្លាយជាម្តាយថ្មី គួរអនុវត្តការមើលថែទាំកូនតាមការណែនាំពីវេជ្ជបណ្ឌិត កុំជឿលើពាក្យចាស់បុរាណខ្លាំងពេក៕

ការបំបៅដោះកូនអាចជួយឱ្យម្តាយគេចផុតពីជំងឺទឹកនោមផ្អែម

ការសិក្សាមួយបាននិយាយថា សក្តានុពលនៃការបំបៅដោះកូនអាចជួយម្តាយឱ្យគេចផុតពីគ្រោះថ្នាក់នៃជំងឺទឹកនោមផ្អែម។ ការស្រាវជ្រាវបានបង្ហាញថា ការបំបៅដោះកូនបានជួយសម្រួលដល់ការរំលាយអាហារ ការពារម្តាយពីជំងឺទឹកនោមផ្អែម។

ប្រព័ន្ធរំលាយអាហាររបស់ម្តាយបំបៅដោះកូនបានច្រើនជាង ៣ខែខុសពីម្តាយបំបៅដោះកូនក្នុងរយៈពេលខ្លី។

អ្នកស្រាវជ្រាវម្នាក់ជនជាតិអាលឺម៉ង់លោក Daniela Much បានលើកឡើងថា "ការបំបៅដោះកូនរយៈពេលយូរបានបង្កើនដល់ការផលិតសារធាតុផូស្វ័រលីពីត និងកាត់បន្ថយអាមីណូអាស៊ីតក្នុងប្លាស្មាឈាមរបស់ម្តាយ"។

តាមការស្រាវជ្រាវថ្មីៗនេះបានឱ្យដឹងថា សារធាតុមេតាប៉ូលីតក្នុងប្រព័ន្ធរំលាយអាហារបានជួយរារាំងដល់អាំងស៊ុយលីន និងជំងឺទឹកនោមផ្អែមប្រភេទ ២។

ការសិក្សាពីមុនបានបង្ហាញថា ការបំបៅដោះកូនច្រើនជាង ៣ខែក្រោយឆ្លងទន្លេរួច អាចជួយការពារអ្នកពីជំងឺទឹកនោមផ្អែមបានរយៈពេលច្រើនជាង ១៥ឆ្នាំ។

អ្នកវិទ្យាសាស្ត្រជាច្រើនបានវិភាគ និងពិនិត្យលើអ្នកកើតជំងឺទឹកនោមផ្អែមក្នុងពេលមានផ្ទៃពោះជិត ២០០នាក់។

អ្នកចូលរួមក្នុងការសិក្សាមួយនេះទទួលបានការព្យាបាលគ្លុយកូសក្នុងឈាមទុកជាមុន និងក្នុងកំឡុងពេលធ្វើតេស្ត។

លទ្ធផលបានបង្ហាញថា ជាមធ្យម ស្ត្រីដែលកើតជំងឺទឹកនោមផ្អែម ជាស្ត្រីបំបៅដោះកូនបានតិច និងក្នុងរយៈពេលខ្លីជាងស្ត្រីដែលបំបៅដោះកូនបានច្រើន និងគ្មានជំងឺទឹកនោមផ្អែម៕

ប៉ែន ចំរ៉ុង ពោលថា «ស្រឡាញ់កូនខ្លាំង» ខណៈ ភិន សុដាលីស ប្រាប់ថា «ពេលកូនកើតមក មិនចាំបាច់ឲ្យស្គាល់មនុស្សប្រភេទនេះទេ»

(ភ្នំពេញ)៖ ស្របពេលដែលអ្នកនាង ភិន សុដាលីស បានប្រាប់ជាសាធារណៈថា អតីតប្ដីហេងស៊យរបស់នាង គឺលោក ប៉ែន ចំរ៉ុង ហាក់មិនប្រាកដថា កូនក្នុងផ្ទៃរបស់នាង គឺជាកូនរបស់ខ្លួនផងនោះ ពេលមន្រ្តីតុលាការចោទសួរ នៅឯសាលាដំបូង រាជធានីភ្នំពេញ ស្រាប់តែលោក ប៉ែន ចំរ៉ុង បែរជាមកពោលពាក្យថា លោកពិជាស្រឡាញ់កូន ស្រឡាញ់ខ្លាំង ក្នុងកិច្ចសម្ភាសន៍ ជាមួយនឹងលោក សាន្ត ប៊ុនធឿន កាលពីម្សិលមិញនេះ ធ្វើឲ្យមហាជនដែលដឹងរឿងច្បាស់ ហាក់មានចម្ងល់ថា តើការពោលពាក្យបែបនេះ ជាការសម្ដែងរបស់លោក ប៉ែន ចំរ៉ុង ឬយ៉ាងណា ខណៈដែលរឿងរ៉ាវដែលបានកើតឡើងកន្លងមក ត្រូវបានអ្នកនាង ភិន សុដាលីស និយាយថា គឺជាការសម្ដែងរបស់ ប៉ែន ចំរ៉ុង។

ពាក្យសំដីរបស់ លោក ប៉ែន ចំរ៉ុង ជាតារាសម្តែង និងពិធីករល្បីឈ្មោះប្រចាំកម្ពុជា ដែលបាននិយាយចេញពីបេះដូង ចំពោះកូនថា «ខ្ញុំពិតជាស្រឡាញ់កូនខ្ញុំណាស់... ស្រឡាញ់ខ្លាំងបំផុត» គឺបាននិយាយឡើង បន្ទាប់ពីសាលក្រមតុលាការចេញនៅថ្ងៃទី ២០ កក្កដា ឆ្នាំ ២០១៦ កន្លងទៅនេះ កំណត់ឲ្យតារាលិស្បៈ ដែលមានឈ្មោះល្បីល្បាញ ប្រចាំកម្ពុជា ទាំង២នាក់គឺ លោក ប៉ែន ចំរ៉ុង និង អ្នកនាង ភិន សុដាលីស ត្រូវចែកផ្លូវគ្នា ដែលបន្សល់ទុកនូវឈាមមួយតំណក់ ទៅឲ្យខាងស្រីជាអ្នកទទួលខុសត្រូវ។ ចំណែកលោក ប៉ែន ចំរ៉ុង បានរថយន្តមួយគ្រឿងម៉ាក Lexus 400h តម្លៃប្រមាណជាង ៤ម៉ឺនដុល្លារ ។

លោក ប៉ែន ចំរ៉ុង បានបញ្ជាក់យ៉ាងច្បាស់ថា «ខ្ញុំពិតជាស្រឡាញ់កូនខ្ញុំណាស់ ស្រឡាញ់ណាស់... ស្រឡាញ់ខ្លាំងបំផុត» ទាំងអស់នេះបង្ហាញពីអារម្មណ៍ពិត ដែលឪពុកតែងកើតមានឡើងចំពោះកូន ហើយពិតណាស់ដូចពាក្យចាស់ តែងតែនិយាយតគ្នាថា «ម្តាយឪពុកឯណាដែលមិនស្រឡាញ់កូន»។ ប៉ុន្តែតាមរយៈសម្ដី និងទង្វើរបស់លោក ប៉ែន ចំរ៉ុង ត្រូវបានទស្សនិកជនសន្និដ្ឋានបានថា គ្រាន់តែនិយាយឲ្យធូរៗពោះប៉ុណ្ណោះ ព្រោះលោកពូកែសម្ដែងណាស់ ហើយប្រសិនបើ ប៉ែន ចំរ៉ុង ចេះនិយាយបែបនេះ មិនមែនពេលតុលាការសួរថា កូនក្នុងផ្ទៃរបស់ភរិយាលោក ជាកូនរបស់លោកពិតមែនឬទេ បែរជា ចំរ៉ុង ឆ្លើយថា «មិនច្បាស់» ដូច្នេះឡើយ។

ងាកមកអតីតភរិយា អ្នកនាង ភិន សុដាលីស ឯណេះវិញ ពេលឮ ប៉ែន ចំរ៉ុង ពោលពាក្យថា កូនក្នុងផ្ទៃរបស់នាងហាក់មិនច្បាស់ថា មានជាមួយខ្លួន (ចំរ៉ុង) ធ្វើឲ្យនាងស្រឡាំងកាំងនិយាយលែងចេញ ព្រោះបើនិយាយអ៉ីចឹង បានន័យថា ចំរ៉ុង កំពុងចោទនាង មានសាហាយស្មន់ជាមួយអ្នកផ្សេង ពេលរួមរស់ជាមួយគ្នា ជាប្ដីប្រពន្ធ។ ដាលីស បញ្ជាក់ថា ពេលកូននេះកើតមក នាងមិនឲ្យស្គាល់ ឬមិនឲ្យឃើញមុខ ចំរ៉ុង ជាដាច់ខាត ព្រោះជាឪពុក ដែលគ្មានទំនួលខុសត្រូវ តាំងពីកូនមិនទាន់កើតមកម្ល៉េះ។ ដាលីស អះអាងថា កូនរបស់នាង មិនចាំបាច់ឲ្យស្គាល់មនុស្សប្រភេទ ដូច ប៉ែន ចំរ៉ុង ទេ ។

សូមរំរឭកថា ទង្វើរបស់ លោក ប៉ែន ចំរ៉ុង ត្រូវបានអតីតប្រពន្ធរបស់លោក អ្នកនាង ភិន សុដាលីស បានទម្លាយទៅឲ្យសាធារណៈជន បានដឹងថា លោក ប៉ែន ចំរ៉ុង ធ្វើការលែងលះនេះ គឺ ចង់ធ្វើការសងសឹក ទៅនឹងឪពុករបស់នាង គឺលោក អិន សុភិន តែប៉ុណ្ណោះ ពោលគឺ ប៉ែន ចំរ៉ុង មិនបានស្រឡាញ់ ដាលីស ដោយស្មោះនោះទេ៕